Korrektie Instituut Aruba (KIA) ta conociendo diferente cambio y mehoracionnan pa ofrece e detenidonan di tur edad miho oportunidadnan pa resocialisa y rehabilita, y asina logra miho reintegracion cu un miho fundeshi den comunidad ora cu nan recobra nan libertad.
Recientemente un di e trahadonan di KIA, esta Harold Koolman a tuma na su encargo e reapertura di e biblioteca, cual tabata cera pa un anja. El a lidera e proyecto pa cual el a haya e cooperacion excelente di 3 detenido cu a traha hunto cun’e cu hopi entusiasmo 7 dia pa siman te ora cu nan a keda cla.
E procesdo di limpiesa, renobacion y reapertura di e biblioteca a tuma menos tempo cu e premira, y esaki ta danki na e bon colaboracion di e lider di e proyecto cu e tres detenidonan. Actualmente KIA tin un biblioteca cu tur hende por ta contento cu’ne y orguyoso di dje.
Koolman ta splica cu e bukinan cu nan tin den e coleccion tabata den e biblioteca caba, y cu nan a haya algun buki como donacion, pero nan ta desea di haya mas buki pa ofrece un seleccion mas grandi na e detenidonan.
Harold Koolman ta gradici Director di KIA Rocco Tjon pa a dun’e e oportunidad pa cuminsa e biblioteca bek, cual a inclui e renobacion completo, incluyendo e mueblenan, plus e trabao pa drecha y organisa tur e bukinan. Durante di e proceso, Tjon y coleganan di Koolman a bin check e proyecto, nan a keda contento cu locual nan a topa cu’ne y a dun’e nan “blessing” pa e sigui.
E biblioteca ta bay ta habri pa ricibi detenidonan for di 8’or di mainta pa 4’or di atardi y ta conta cu un trahado pa yuda nan. E procedura ta mescos cu esun nan un biblioteca normal, unda cu e persona ta fia un buki y ta trec’e bek despues di dos siman.
Koolman a agrega cu e ta desea di ricibi yudansa di instancianan manera biblioteca nacional pa amplia e coleccion di buki.
Rocco Tjon a splica cu, banda di un ampliacion di e cursonan y lesnan cu ta bay cuminsa pa ofrece detenidonan mas oportunidad pa sinja un ofishi of un habilidad nobo, e biblioteca ta hunga un rol grandi den nan oportunidadnan pa recreaccion.
Un cierto cantidad minimo di actividad ta determina pa leynan y e organisacionnan internacional cu ta evalua centronan di detencion manera CPT, Rocco Tjon a agrega, pues KIA ta ampliando grandemente no solamente e cursonan, oportunidadnan pa sinja un ofishi, pero tambe su programa di resocialisacion y ta trahando riba subi e nivel di calidad di e actividadnan cu ta ofrece.
E biblioteca ta un di e derechonan di e detenidonan, y KIA ta cumpli awo cu e punto di interes importante aki tambe awo. E reunion cu comision di detenido tambe ta un di e puntonan di interes cu ta cumpli cu’ne for di algun tempo caba. Durante di e reunion aki, e detenidonan ta vocifera nan mes y re-apertura di e biblioteca ta un di e cosnan cu nan a pidi p’e, Tjon a remarca.
Louis Croes, kende tin 27 aña di servicio na KIA, ta e “afdelingshoofd” bao di cua e biblioteca ta resorta. El a splica cu a traha un programa pa e detenidonan cu ta encera un siman pa bishita biblioteca y un siman di pelicula.
Tin diferente plan, Croes a bisa, y tin diferente cos cu ta wordo desaroya; e proyectonan ta tuma tempo, pero poco poco ta yega mas cerca na cumpli cu e rekisitonan di CPT cu ta inclui mas ora di recreacion.
E interes pa cu e oportunidadnan aki ta creciendo cerca e presonan y nan mes ta motiva otro pa haci uzo di nan.
Ainda e detenidonan no tin acceso na Internet, pero si tin computer pa nan por type carta, etc., el a comenta.
Louis Croes ta conclui bisando cu “sanger nobo ta trece algo nobo”, y e comunicacion ta bon, referiendo na e presencia di un director nobo den e institucion.