Colaboracion entre DAS y DPL a ser reenforsa

Caminda tin ‘teamwork’, cosnan grandi por wordo logra. Esaki netamente tabata e meta tras di e encuentro entre e dos departamentonan.

Riba diabierna 8 di maart ultimo a tuma luga pa prome biaha, un encuentro entre Departamento di Asunto Social (DAS) su seccion completo di bijstand y Departamento Progreso Laboral (DPL) su seccion completo di Jobcenter. Ambos departamento a haya e oportunidad di informa otro tocante nan servicio, tarea y alabes trece puntonan di mehoracion dilanti.

Manera stipula den e Ley di bijstand y prueba den practica, e ta tuma un colaboracion di ambos departamento na momento cu un ciudadano confronta su mes cu un situacion financiero dificil den bida y dicidi di busca un ayudo financiero temporal, esta haci un peticion pa bijstand.

Durante e mainta aki hopi informacion a wordo duna y comparti pa asina hunto por forma un bon base di colaboracion entre seccion di bijstand y Jobcenter. DAS su seccion di bijstand a tene dos presentacion, e prome tabata tocante bijstand en general y e di dos tocante e rol di DPL den otorgamento di bijstand. Jobcenter na su turno a sa di informa DAS di nan procedura di trabou y tambe a trece diferente punto di mehoracion dilanti.

Na final, tur trahado a haya e oportunidad di comparti cu otro locual nan a siña, ideanan, conocemento y experiencia. Ambos departamento sa nan puntonan di mehoracion pa asina no solamente mehora nan servicio pero tambe facilita e procedura di trabou door di traha riba e mesun liña. Notabel tabata e peticion pa mas di encuentronan aki keda tuma luga y pa tambe invita otro instancianan cu den un of otro manera ta wordo involucra den e proceso. Esaki como meta pa traha hunto riba e mesun liña y na final di dia, brinda un servicio optimal na e Pueblo di Aruba.

Departamento di Asunto Social kier gradici hefe di seccion di bijstand sra. Jessica Arends-Peterson y e hefe di Jobcenter sr. Orlando Hutchingson pa e tremendo iniciativa aki y alabes pa tur cu lo tuma luga den futuro.

Si bo persona ta desea mas informacion por tuma contacto cu DAS su seccion di Relacion Publico na telefon 528-1100 of bo por ‘like’ nos pagina di facebook Departamento di Asunto Social y keda bon informa.

Comments

comments