NEW YORK, Merca – White House a emiti un declaracion unda cu e ta delanta cu, den respuesta na e fayo di corte, e lo reestablece “temporalmente e pase di e periodista”.
Un hues federal di Merca a dicta diabierna cu e presidente Mericano, Donald Trump, lo mester restitui e periodista di CNN, Jim Acosta, acceso na White House.
Un hues di tribunal di distrito di Merca, Timothy Kelly, designa pa e mesun presidente, a anuncia su decision na fin di un audiencia na Washington. Segun e veredicto, e credencialnan di Acosta mester wordo duna bek y reactiva di inmediato pa dun’e acceso na White House.
Kelly a argumenta cu gobierno no por a bisa ken a dicidi inicialmente di revoca e pase di Acosta. Aunke White House a splica su motibonan pa revoca su credencialnan mediante un tweet di e secretaria di prensa, Sarah Sander, y pa medio di un declaracion despues di cu CNN a presenta su demanda, hues a haya cu “e esfuersonan aki, ademas di ta laat, no tabata suficiente pa satisface e debido proceso”.
Di otro banda, Kelly a enfatiza cu e periodista a sufri un “daño ireparabel” desestimando e argumento di gobierno di cu CNN lo por mana otro periodista pa White House.
E decision di Kelly ta di caracter temporal, sperando di cu mas audiencia wordo realisa den proximo simannan pa determina si e medida tuma pa White House a viola e derechonan di Acosta, contempla den e First Ammendment y Fifth Ammendment.
Sin embargo, e cadena a mustra di ta satisfecho cu e dictamen aki y a expresa den un comunicado cu e ta spera un “resolucion completo den e proximo dianan”. Nos mas sincero gradicimento na tur cu a apoya, no solamente CNN, sino un prensa Mericano liber, fuerte y independista”, e medio a agrega.
Di su banda, White House a emiti un declaracion unda e ta bisa cu, respetando e decision di corte, e lo restablece “e pase di e periodista, temporalmente”.