NEW YORK, Merca- E cadena di noticia CNN a presenta un demanda contra di presidente Donald Trump y varios di su consheronan, buscando e restauracion inmediato di e acceso na White House di su coresponsal Jim Acosta, segun e propio medio a anuncia.
E demanda a wordo entrega diamars mainta den e Tribunal di Washington. Como demandante a presenta tanto e mesun Acota como e cadena pa cual e ta traha.
E denuncia ta contra seis persona, entre cual presidente Donald Trump, e hefe di gabineta di White House, John Kelly, secretaria di prensa Sarah Sanders, subhefe di gabinete pa comunicacion, Bill Shine; director di Secret Service Joseph Clancy, y un oficial no identifica di Secret Service cu a kita Acosta su pass pa White House diaranson siman pasa.
Dia 7 di november ultimo, e mandatario Mericano a rabia durante un conferencia di prensa na White House, despues di un discusion cu Acosta, kende el a acusa di ta un enemigo di pueblo, y a nenga di contesta su preguntanan.
“Abo ta un persona grosero, teribel. Bo no mester ta trahando cu CNN”, Trump a bisa. Despues, WHite House a revoca e credencial periodistico na e coresponsal di CNN.
Di mes manera, e secretaria di prensa di White House, Sarah Sanders, a anuncia e decision acusando e periodista di “ comportamento inapropia” pa un incidente cu a tuma luga ora cu’n becado a purba kita e microfoon for di dje pa duna otro periodista pero Acosta a nenga di haci esaki y a sigui haci pregunta na e mandatario.
CNN y varios grupo di defensa di derechonan di periodista a critica e declaracionnan di Sanders y a afirma cu e credencialnan di Acosta mester wordo reestableci.