Tabata na December 2017, cu trahadonan di CMB a ricibi un carta di parti di gerencia, unda ta informa nan cu, desde 1 Januari 2018, lo stop tur beneficio secundario pa cu e trahadonan. Motibo duna ta cu banco a hiba perdida na 2017, pa cual no por sigui paga tur e beneficionan cu e trahadonan ta gosa di dje.
Pero, despues cu aña 2018 a habri, gerencia di CMB a dicidi di sponsor diferente eventonan di carnaval. Esaki sigur ta algo cu a hala hopi atencion cerca e trahadonan paso nan a tuma nota cu CMB a bisa di no por cumpli cu nan debi cu aña 2017 no tabata un bon aña pa e banco, pero si nan por hinca sumanan grandi di placa den Carnaval.
Trahadonan a laga nan voz resona y consecuencia di esaki ta cu gerencia a dicidi di hala atras su decision di kita e beneficionan di e trahadonan. Tambe dia 7 di Februari ultimo, CMB a organisa un fiesta pa su trahadonan ariba e parkeerplaats na Playa, pa asina gradici e trahadonan. Di otro banda e referendum lo bay tuma luga aki algun siman y asina mes e trahadonan ta para duro pa haya e sindicato FTA pa bira nan representante pa cuminsa negocia nan CAO.
Pregunta ta keda e ora, si aña 2017 tabata asina malo, cu hasta beneficio mester a kita di e trahadonan, di unda e placa a bin pa sponsor actividadnan di Carnaval? Tur cos ta mustra cu e anuncio mas recien di MCB-Group ta un ultimo intento di nan banda pa persuadi e empleadonan di CMB na Aruba pa laga un banda e pensamento di trece un sindicato den e banco. Manera ta conoci CMB ta e unico banco grandi na Aruba cu no ta sindicalisa. E empleadonan di tanto Aruba Bank, como tambe RBC Aruba y Banco di Caribe ta wordo representa sindicalmente door di FTA cual ta trese cun’e cu nan beneficionan laboral ta wordo regla den un Contrato Colectivo di Trabao (CAO) cu ta wordo negocia periodicamente.
Na prome bista por bisa cu e accion di parti di MCB – Group por parce uno noble, e realidad ta cu si no ta pa e hecho cu e trahadonan di CMB na Aruba a uni hunto y exigi pa nan derechonan wordo respeta, hamas y nunca gerencia lo a hala atras di e medidanan cu e mes apenas un luna prome a cualifica como “irreversible”. Si acaso banco tawata di buena fe for di un principio, anto desde e momento cu FTA a alerta nan riba e erornan cometi, esakinan lo a wordo coregi. Sinembargo tur cos ta indica cu e presion enorme cu tin riba banco pa cu e referendum yama door di Mediador di Gobierno di cual su fecha ta acercando, a haci cu a cuminsa tuma accion evasivo. Importante ta pa realisa cu e hecho cu banco e biaha aki a retira su medidanan, no ta duna ningun garantia cu den futuro medidanan similar no lo wordo tuma un biaha mas.
Prueba di esaki ta cu den pasado ya caba banco di forma unilateral a haci diferente cambio den beneficionan secundario di e empleadonan. Como cu e tempo ey no tawatin resistencia fuerte, e cambionan aki nunca a wordo retracta manera ta e caso e biaha aki. E unico forma di sigura cu den futuro banco no por cambia unilateralmente beneficio y/o condicionnan laboral di e empleadonan, ta door di aanslag esakinan den un CAO, como cu di e forma aki no por bin ningun cambio sin consentimento explicito di e sindicato. Otro formanan di consulta, manera un “employee council” cu pa motibonan obvio ta wordo promovi door di banco, no lo surti efecto como cu a base di ley nan no tin e autoridad pa cera un CAO y historicamente ta proba cu e influencia di e empresa den e tipo di organonan consultativo aki ta extremadamente halto. Por lo tanto nan no por wordo considera como independiente y ta wordo prohibi na diferente pais como tambe pa organisacionnan internacional manera ILO.
E fiesta di MCB- CMB Group tabata conta cu un di e bandanan di momento, esta Buleria y tambe cu nos artista internacional, Jeon. Hopi trahado sigur a disfruta di e fiesta, pero e pregunta cardinal ta keda: ken a paga? di unda a saca e placa pa organisa un fiesta asina, si banco mes na December ultimo a laga sa cu nan no tin placa pa paga beneficionan di trahado, pero mane aña a bolter, ta sali nan cla cu pa sponsor Carnaval si tin fondo, pa organisa fiesta si tin fondo, pero asina yega turno di e trahadonan, cu ta esunnan cu tin e banco na halto, esaki nan mes ta wordo lubida cu excusa “no tin placa”. Quo Vadis, CMB?