Directiva di SV Universal kier pone e bario na altura di e ultimo desaroyonan cu a bin ta tumando luga cu e club.
Na prome luga mester bisa cu e yobidanan cu tabatin e ultimo dos lunanan a causa basta daño na e club, pero a mustra tambe e mal estado di principalmente e daknan y murayanan. Debi na e situacion aki directiva mester a tuma e decision cu no por organisa actividad mas pa publico den e edificio di SV Universal di inmediato. Na mesun momento a cuminsa cu e proceso pa traha un rapport di e gastonan envolvi pa drecha e dak, murayanan y renoba e bañonan completamente y cuminsa cana e caminda pa busca financiamento necesario. Loke tambe mester remarca cu na momento e directiva aki a tuma over, a hereda un debe di 31 mil florin di belasting cu a bin ta pagando poco-poco y cu ta un peso hopi pisa na e momentonan aki.
Cu e poco cu tabatin disponibel a logra organisa diferente evento den 2016 cu a yuda cumpli principalmente cu e debe di belasting.
Directiva ta lamenta di mester a yega na e decision aki, pero e ta pa propio siguridad di esnan cu ta haci uzo di e sala grandi.
Sinembargo ta evaluando pa tene un celebracion riba 18 di Maart, riba e veld p’asina e bario toch pa celebra e dia nacional. Pa esaki lo tin mas informacion den e dianan cu ta bin.
Tambe a keda papia den e ultimo reunion di directiva cu ta cuminsa e preparacionnan pa eleccion di directiva. Mirando e temporada di carnaval, e eleccion lo tuma luga na inicio di Maart, 2017. Si tin un grupo interesa pa forma parti di e siguiente eleccion pa directiva, nan por manda nan nomber via [email protected] mientras cu ta cuminsa busca e firmanan di apoyo necesario. Tur persona cu ta inscribi como miembro por postula nan mes como candidato pa directiva y por participa den e reunion general di miembro cu fecha lo wordo anuncia despues.