Club Kibrahacha: ‘Impacto di e pandemia tabata enorme pa nos grandinan’

Club Kibrahacha tin dos bus cu ta transporta nos grandinan di cas pa Kibrahacha y vice versa.

Jeffrey Matos, Director di Club Kibrahacha ta bisa cu nan centro di actividad actualmente ta haciendo actividad pa nos grandinan. Apesar di e situacion dificil cu tin na Aruba, e fundacion tog -cu diferente protocol – ta percura pa tin actividadnan pa nos grandinan na centro di actividad na piedra plat. Actualmente segun sr. Matos un grupo mas chikito ta biniendo e actividadnan. “E ta comprendibel, y sigur tambe nos kier cumpli cu tur nos reglanan y protocolnan pa asina nos cuida e salud di nos grandinan”, segun sr. Matos.

Pa e fundacion e ta un situacion cu nan por controla awor cu tin menos hende na e luga, nan ta traha cu boluntarionan y nan por tin miho control. “Riba un situacion normal na Kibrahacha, nos tin un 300 miembro, y riba un situacion normal ta bin un 60% di hende pa dia. Actualmente nos ta draai cu menos bishitante, pero si tambe tin miho control pa proteha nan di cualkier situacion cu por presenta,” segun sr. Matos.

Nan tin henter un sistema hinca den otro di registracion, transporte coordina, henter un planificacion basta grandi pa por tog cumpli cu e necesidadnan cu nos grandinan tin, pa evita tambe cu nan keda nan cas den soledad. “Pero alabes e cuido, e prevencion pa nos grandinan, nos ta inverti hopi energia y tur dia nos ta wak esey pa asina evita cualkier situacion cu por presenta y ta bon prepara”, segun sr. Matos ta bisa.

Como fundacion, semper nan tabata tin un open-door-policy, caminda personanan di cualkier districto por bini ki ora cu ta haci actividad y socialisa,pues e impacto di e pandemia sigur tabata grandi pa nan. “Pasobra na momento cu e situacion di crisis a presenta, bo no por tin actividad den grupo mas pues mester adapta full bo structura di organisacion pa por a yega na tog cumpli cu e necesidad di nos grandinan”, sr. Matos ta bisa.

35 aña di existencia
Club Kibrahacha ta haci e aña aki 35 aña di existencia, haciendo actividadnan pa nos grandinan cu ta bin for di tur districto di Aruba. “Nos tin dos bus cu ta transporta nan di cas pa Kibrahacha y vice versa. Esey ta e retonan cu nos a haya pasobra nos fundacion pa hopi aña e gastonan operacional di e fundacion ta wordo paga door di comercio, un parti door di gobierno, rotary y un parti hopi chikito cu nos grandinan mes ta contribui cu ne”, sr. Matos ta splica. Pero e meta principal di e concepto financiero ey ta pa nos grandinan por participa den actividadnan. Hopi di nos grandinan tin un pension hopi chikito pero ta importante ta cu pa 35 aña a logra haci actividadnan pa nos grandinan.

E situacion financiero no ta den su miho momentonan awo na Aruba, y e fundacion manera tur aña tin nan recaudacion di fondo, bazaar y loteria cu diferente premio. Awo e fundacion ta bay cuminsa inicia esaki y pa December nan tin un rifa, adapta na e situacion di crisis. E premionan antes tabata viahe pa crucero y diferente viahe, mirando e situacion mundial, a adapta e premionan y haci nan mas atractivo tambe, incluyendo gift certificates cu diferente supermercadonan grandi, lugarnan pa materialnan pa renobacion di cas y diferente otro premio pa asina tog haya e contribucion di comunidad pa cu e recaudacion di fondo pa asina sigui traha na bienestar di nos grandinan na Aruba.

Comments

comments