Club Kibrhacha den cuadro di nan 36 aña di existencia ta organisa un Webinar, cu lo tuma luga otro siman diahuebs y diabierna (30 di September y prome di October). Esaki ta e anuncio haci door di Jeffrey Matos, Director di Club Kibrahacha a duna di conoce. Banda di celebracion di nan añanan di existencia, ta recorda e hecho cu e fecha di prome di October ta celebra Dia di Adulto.
Traha Hunto pa un Miho Bienestar di Adulto Mayor lo ta tuma di e Webinar. E envehecimento tumando luga na Aruba bou di un gran parti di e poblacion ta algo cu Club Kibrahacha ta pasa aden dia a dia debi na e trabou cu nan ta desplega. Esaki ta un forma pa traha hunto cu otro organisacionnan y trece e topico di Envehecimento na Aruba na discusion pa yega na solucionnan cu ta na beneficio di e grupo aki.
Un di e boluntarionan na Club Kibrahacha ta Lenny Gertvliet y el a splica cu e Webinair ta tuma luga na John F. Kennedy Edu Center. Tur hende lo ta orador di Aruba mes y lo trata topiconan cu tin di haber cu bienestar di personanan di edad avansa. Oradornan lo ta Bart Kool (parti financiero), Desiree Helder (lo elabora riba e parti di vivienda); dr. Curiel (salud di curpa) y Lenny Gertvliet lo papia riba e uzo di tempo liber di grandinan. Lo tin un orador di Hulanda cu lo bay via di ZOOM.
Henter comunidad ta wordo invita pa inscribi. Por yama Club Kibrachacha na 5828159. Riba diahuebs e evento lo ta den oranan di mainta so y diabierna e lo ta henter dia.