Club di dam Arowak ta start cu un simultaan pa aña 2021

Club di dam Arowak ta reanuda su actividadnan di dam pa aña 2021 diaranson awor dia 9 di Juni pa 7:00 di anochi. E promer actividad ta un simultaneo cu lo wordo duna door di Rolin Croes.

Como custumber e ganado di e Campeonato di e aña anterior lo habri e actividadnan di dam cu un simultaan. Rolun a titula su mes como campeon di dam di Aruba pa aña 2020.

Un simultaan den wega di dam, ta unda 1 hungado (den e caso aki Rolin), ta hunga cu hopi hungado pareu, haciendo su zet na cada mesa. Tur hungado di dam por participa na e simultaan di dam aki.

Door di limitacion di espacio di e club y reglanan di DVG, por acepta un maximo di 20 participante na e actividad aki. Tur participante mester registra nan nomber y cel ora di entrada den club y mester presenta cu nan mond-masker.

E simultaan ta cuminsa diaranson awor 9 di Juni 2021 pa 7:00 di anochi.

Localidad lo ta den nos clubhuis na Nieuwstraat 11, Oranjestad situa den e edificio pariba di e plein unda e tram ta lora bay bek.

Ta invita henter pueblo hungado di dam pa bin midi forsa cu e campeon di dam di aña pasa den un simultaan. Bo tin un bentaha riba dje door cu e mester parti su atencion entre tur e weganan cu ta wordo hunga e anochi ey. Na final lo check cuanto wega Rolin por a gana, cuanto el a tabla y cuanto el a perde.

Pa bo ta sigur di bo luga, bo por tuma contacto cu Mario Jansen (cel. 699-8245) of Ricardo Wever (592-6391) of Octavio Croes (594-5590) pa mas info y registra bo participacion.

Por pasa tambe sin registra entre 6:30 y 7:00pm riba diaranson dia di simultaan, pero tin un chens cu ya a cera 20 participante caba.

 

Comments

comments