Kico un studiante por siña for di un deportista direndimento halto? Por ehempel con maneha e disciplina y perseverancia. Tanto e studiante como e deportista mester alcansa nan meta dentro di un tempo determina. P’esey, fundacion educativo WeConnect ta organisa un clinica di baseball cu e club di Baseball y Softball Neptunus na Rotterdam. E ex-hungado di baseball Diegomar Markwell lo ta encarga pa dirigi e clinica.
WeConnect
WeConnect ta un fundacion educativo na Hulanda cu ta ehecuta varios proyecto enfoca na bienestar y e exito academico di e studiantenan di Caribe Hulandes. E fundacion ta ofrece entrenamento di presupuesto, tayer di red y buskeda di trabao y encuentro riba salud mental, tur cu e obhetivo di mehora e exito academico. “Baseball t’e deporte mas popular di nos islanan, pa cual nos ta alinea cu algo cu nos studiantenan conoce y ta disfruta. E clinica aki lo inspira nan y cu suerte, lo atrae mas studiante masculino!” Tanja Fraai, manager di WeConnect a splica.
Diegomar Markwell
Diegomar Markwell tabata vincula cu Club Neptunus durante varios decada. E pitcher robesao ta entrenador dipitcher di Rotterdam Unicorns y tambe p’e ekipo nacional di Reino. Na 2023, el a retira oficialmente como hungado despues di mas di 200 partido cu e club. E ta motiva pa haci e clinica aki cu e studiantenan di Corsou, Aruba, y e otro islanan: “Mi tin hopi resiliencia y mi ta motiva pa logra tur cos denh bida a traves di trabao duro. Nunca mi ta rindi y esey ta loke mi kier transmiti n’e studiantenan. Mi lema ta: “E robesaonan nunca ta rindi y esunnan cu ta rindi nunca ta gana.”
Studi9ante
Tur aña por lo menos 1500 studiante di Corsou, Aruba, Boneiro,Sint Maarten, Saba y Sint Estatius ta bin Hulanda pa sigui nan estudio di MBO, HBO of Universitario. E oportunidadnan di estudio na Hulanda ta hopi mas grandi cu riba e islanan. E studiantenan ta enfrenta diferente reto manera e idioma, vivienda, cambio cultural y e transicion di educacion secundario n’esun superior. WeConnect ta un di e organisacionnan cu ta yuda e studiantenan, cu e sosten di varios ministerio mnaera esun di Asuntonan Interior y Relacion di Reino, Educacion y Salud Publico.
Informacion Practica
E clinica di baseball ta cuminsa pa 4’or y mey di atardi y ta caba pa 7’or y mey di anochi,dia 24 di juni proximo. Entrada ta gratis pero ta obligatorio pa registra a traves di e link: [Registro](https://www.eventbrite.nl/e/909810286057?aff=oddtdtcreator). ¡Bon humor y e solo di zomer tambe ta riba e programa!
