Dia 22 di October lo bay tuma luga e Mental Health Awareness Conference, caminda cu lo bay tin varios experto cu lo bay comparti nan conocemento y experiencia cu e comunidad medico.
Un di e participantenan ta e conocido Clifton Ling.
Clifton Ling ex-director di Ling & Sons IGA Super Center NV.; a nace y lanta na San Nicolas y a atende St. Augustinus College. Despues Clifton a bay studia na John F. Kennedy Technische School na Playa den werktuigbouw. Cuminsamento di aña 1970 a studia na Kapiolani Community College y Universidad di Hawaii pa ingenieria mecanica. Pa mas cu 40 aña el a traha den ramo di comestibles den negoshi di su famia. Mr. Ling a fungi como Presidente di ASTA (Associacion di Supermercado y Tiendanan di Aruba) y a wordo honra na 2013 como Outstanding Retailer of the Year den Caribe door di Independent Grocers Alliance basa na Chicago.
Mr. Ling a retira 4 aña pasa y a lanta recientemente Jordan Ling Foundation cu e meta principal pa yuda, y tambe pa promove e cuido di salud mental aki na Aruba den tur sentido amplio di palabra; crea consciencia y tambe pa promove y expande e conocemento di e malesa aki. Y sirbi como un link di apoyo den e cadena di e cuido di e dicsiplinanan cu tin di haber cu e bienestar y interes di e hendenan cu ta sufri di e tipo di deficiencianan mental aki.
E tambe lo bay tey durante e Mental Health Awareness Conference cu lo tuma luga dia 22 di October proximo. Esaki sigur lo priminti di ta un conferencia caminda informacionnan hopi valioso lo wordo intercambia. Manera sr. Ling mes ta bisa: Salud mental no ta toca un individuo, sino full un famia.