Number di auto pa aña 2019 lo conoce cambio. Un di e cambionan aki ta cu lo reintroduci plachi number bek, enbes di e stickernan. Sra. Meverly Romano, vocero di Departamento di Impuesto ta amplia mas ariba esaki.
E plachinan aki ta completamente nobo, y ta bin di color fondo oraño, letter blanco. E plachi ta poco diferente di loke ta custumbra cun’e. E tamaño ta mescos pero e color no ta mescos cu e oraño cu conoce di pasado. E ta un otro color. E ta un otro tipo di coating tambe, dus e verf cu tin ariba dje, cu ta un coating special cu tin e parti reflectivo den dje. Tin cierto otro detayenan cu a cambia ariba dje. Ta spera cu e pa mita di december lo cumisna ricibi e cargamento di plachi number. Fin di november lo no ta alcansabel, pero si ta trahando pa manera cu haya e plachinan, lo set in un team cu lo controla tur e plachinan aki.
Dia 3 di december lo por cuminsa paga ariba e number nobo y lo cuminsa reparti esakinan na comienso di januari. E plachinan aki, segun Sra. Romano, lo wordo otorga, solamente si e seguro di valido. E añanan anterior, e persona tabata paga nan number, e seguro ta wordo controla paden, y prome cu e yega e cahero, et a haya e bewijs cu e seguro ta paga, pa despues di procesa e pago, e ta haya su sticker.
Loke ta bay haci ta, cu ta permiti tur e pagonan, ora cu e cliente bay entrega su plachi, e ora e mester tin su documentonan di seguro y esaki mester ta valido. Na e momento ey di busca e plachi e seguro mester ta valido. E ley no ta exigi cu e seguro mester ta valido pa full e aña cu e persona ta pagando. Solamente tabata tin restriccion pa esey, pa hendenan cu ta paga den december y nan seguro ta caduca 31 di december. Den casonan asina, e cliente no tabata haya nan plachi. A mira caba cu no ta posibel pa entrega e plachinan den e luna ey, pero mas bien na januari. Na momento di busca e plachi, lo controla e seguro. Esaki clientenan mester tene cuenta cun’e.
Actualmente tin clientenan cu ta bende nan auto, nan ta djis kita plachi number, pone ariba plachi number ariba e auto nobo cu nan a cumpra. Pero nan no ta bay haci e cambio oficial na DIMP, cu tal number ta pasa ariba tal auto, pa esaki e wordo registra. Sa pasa cu’n persona ta core cu papelnan di registro di un auto cu e no tin mas. Esey tambe ta un detaye pa cual ta pidi e clientenan pa bin haci e cambionan awo caba. Pasobra den december y januari ta bay bira asina druk, e persona ta bay para warda largo prome cu e yega na beurt pa haci su pago. E cahero ta bis’e cu e registro no ta bon cu e mester wordo registra prome cu e por haci e pago. Esey ta causa irritacion cerca DIMP y tambe cerca e cliente cu e no tin su papelnan na ordo. E ora ta haya cu un solo persona ta wanta e rij cu tin su tras. Esey ta detayenan cu ta hopi importante pa tene cuenta cun’e.
Mester percura pa e registracion di e vehiculo di motro ta na ordo. Si plachi no ta registra corectamente ariba e auto cu e cliente ta coriendo ariba dje actualmente, pa haci e cambio di registracion. Si tin debenan atrasa pa haci e pagonan di e debe ey, ya cu niun persona ta wordo permiti pa paga 2019, sin cu e añanan anterior no ta paga. Eseynan toch ta detayenan hopi importante, segun Sra. Romano. Ta papia di basta mil cliente y tur kier haya chens pa haci e pago. A pesar cu ta promove e pagonan online, pero toch ta haya cu e clientenan lo mester bin na Departamento di Impuesto, pa motibo cu nan tin cu busca nan plachi di number toch of cualkier detaye cu mester wordo regla. Si un persona a paga via banco, pero su registro di auto no ta corecto, toch e mester bay Camacuri pa regla esey, cu ta stroba e cliente di haya su plachi number. Te asina leu, Sra. Meverly Romano, vocero di Departamento di Impuesto.