Den e accion di GKMB y Serlimar a haya un luga caminda cu tabata tira sushi di tairanan di truck cu a trece hopi criadero. Clayton Croes, di GKMB a splica kico nan a haya nan mes den dje.
E caso aki ta uno alarmante. Pa e cantidad di criaderonan y e origen di e criaderonan aki, un biaha mas ta un dump ilegal, cual cos no kier pa pasa. Ta juist e peliger cu tin den comunidad, ta e problema cu GKMB ta hayando, ta e camindanan cu no ta zomaar ta haya acceso na dje. Tampoco ta wordo controla diariamente, den e sentido cu e backbone di GKMB ta e control di cas pa cas y di e manera ey ta controla y haya sa tambe, cual ta e criaderonan di mas comun y kico ta target den nan campaña. Ta haya situacionnan asina aki cu ta for di comun y loke no kier mira cu ta e sushedad den naturalesa basicamente y ta mira cu di e mesun manera ta causa peliger grandi pa salud publico en general. Esakinan ta obhetonan cu a contene awa caba. Nan tin awa den nan. Esakinan no ta papia di criaderonan potencial, ta criaderonan activo, na cantidadnan hopi grandi, cu ta contene e sangura y e pupanan di e sangura Aedis Aegypti, cu ta transmiti Dengue, Chikungunya y Zika. GKMB tabata den parti di un mondi, pero toch tin hopi cas rond. Un biaha mas, pafo di bista hendenan ta haci mal uzo di un pida mondi bunita cu nan tin y deshaci di nan propiedadnan cu mester wordo deshaci apropiadamente, pero ta tiranan den mondi. Di e manera aki a drenta melding dialuna. Inspectornan cu a controla den e region, a drenta mondi den e sentido cu nan a mira tire na entrada y a constata cu tabata tin mas tire. Nan a wordo trata ayera caba y contactonan a wordo tuma cu un partner importante, esta Serlimar pa wak con ta yuda GKMB, mirando cu semper nan a coopera bon cu nan, den sentido di elimina obhetonan cu ta bira criadero y cu ta criadero caba, den e caso aki segun Croes.