Recientemente e isla di Sint Maarten a celebra nan carnaval. Durante un di e anochinan di concierto nos artista local Claudius Philips y su banda OREO tabata un di e bandanan mas anticipa. Tabata trata di e di 5 aniversario di e famoso anochi “Night of the Hitmakers” unda Destra, Jean Marc Ferdinand, KAI y Impakt Band tambe a toca. Tanto e publico cu tabata consisti di mas di 8000 persona y e organisadornan a keda mas cu satisfecho pa e nivel di presentacion di Claudius y OREO. Claudius a sa di prepara hopi bon pa e concierto aki mirando cu e ta hunto cu otro artistanan sumamente grandi internacionalmente y esaki ta Claudius su di dos presentacion den e festival. E publico a sa di baila y canta non stop na momento cu Claudius tabata presenta su exito clasiconan pero tambe ora cu e la invita varios cantante di Sint Maarten pa subi canta cun’e. Esaki tabata algo cu ningun persona a spera. Tabata trata di artistanan cu tin basta tempo sin canta, aki Claudius Philips a duna nan reconocemento y a laga nan presenta hunto cun’e riba escenario cu su banda di Aruba Claudius & OREO.
Naturalmente tabata tin hopi Arubiano presente cu a comenta cu nan a haya “kippevel” di tanto emocion pa con Claudius y OREO a sa di move e miles di hende y cu orguyosamente por bisa cu ta trata aki di un banda di Aruba. Por a mira varios bandera di Aruba tambe den e luga.
Prensa di Sint Maarten tabata tin comentarionan positivo so pa duna di e presentacion e sigiente dia den corantanan y emisornan. E pregunta grandi cu a keda ta con e organisadonan lo por supera e festival di e otro aña. Den Medianan social tanto na St. Maarten, Corsou y Aruba ainda ta comenta y ta duna Claudius Philips un pabien pa un show “Well Done”.