E aña aki e alumnonan cu a cualifica individual of cu nan team pa e Weganan Interinsular lo tin un weekend yena cu weganan deportivo y actividad acuatico planea dia 7 te cu 9 di April 2017.
Despues di amplio discusion cu e comision Interinsular di Bonaire y Curaçao a dicidi conhuntamente cu lo no ta responsabel pa continua cu e Weganan Interinsular debi na e circunstancianan imprevisto cu no por garantisa un biahe sin problema pa tur e participantenan.
En conexion cu cancelacion di e intercambio deportivo cu e otro islanan, IBiSA ta ofrece e alumnonan y nan coach un programa alternativo, caminda nan lo bay pasa un weekend na “Tropicana Aruba Resort” di dia 7 te cu 9 di april.
E grupo completo, bao guia di nan coaches, begeleider di scol y coordinadornan di Deporte Escolar di IBiSA, lo pasa un dia cu weganan deportivo y acuatico na “De Palm Island” riba diasabra 8 di April.
E meta di e plan alternativo aki ta pa duna e alumnonan cu a logra di cualifica pa e Weganan Interinsular y cu a train caba pa representa nan scol y nan pais, un trato special pa nan sinti nan mes orguyoso pa locual nan a logra y na mesun momento pasa bon hunto durante un fin di siman yen di actividad.
Nos ta desea e muchanan un “Dushi” Weekend.