“Nos ta orguyoso di nos servicio di Ambulance!” Esaki ta palabranan di Dokter Joel Rainjherc…. ora el a sinta cu fraccion di AVP pa informa nos riba tur e servicionan cu IMSAN ta brinda na nos comunidad. Su wowonan tabata briya ora e ta conta fraccion di AVP riba e servicio di ambulance. Nos tambe ta orguyoso sigur y esaki mester gradici nos gobierno tambe cu awe nos ta conta cu 10 auto di ambulance nobo cu ta di aña 2014,2015 y 2016. Tin 3 post di ambulance na Aruba parti den 3 rayon. Na San Nicolas tin un post cu 2 ambulance, den Schotlandstraat tin un post cu 2 ambulance y na Wayaca tin e post di mas grandi cu 6 ambulance door cu ta central y claro mester cumpli cu rating di aeropuerto tambe den caso di calamidad. Tin 16 verpleegkundige ta traha riba ambulance cu ta full certifica pa brinda servicio riba ambulance. Y desde aña 2013 a cuminsa cu certificacion pa ta ambulance verpleegkundige cu docentenan di Hulanda cu ta bin duna e certificacion aki. Manera e palabra di dokter Rainjherc mes: ” brain power first mechanic power second”. Tin 13 ambulance chauffeur cu ta certifica pa ta assistent verpleegkundige tambe. Y entre otro ta sigui cursonan di “slipgevaar” tambe riba con pa maneha e auto ora tin “bottlenecks” den trafico. Riba cada warda tin 1 officier van dienst y 2 rapid responders. E personal di ambulance ta completamente ekipa pa nan cumpli cu nan meta principal pa duna e “pre hospital care” cu mester ta optimal. Nos por bisa tambe cu nos tambe ta orguyoso di nos ekipo di ambulance cu ta brinda bon servicio na nos comunidad. Y awendia miho ekipa cu nunca. Den pasado tabatin hopi critica cu falta ambulance pa brinda servicio na nos comunidad pero awe nos ta orguyoso cu despues di aña 2009 a inverti pa amplia e “wagenpark” di ambulance y tambe a inverti den e capital humano pa asina brinda servicio di calidad na nos comunidad. Na e trahadornan di ambulance nos kier bisanan cu nos di fraccion di AVP tambe ta hopi orguyoso di nan y di nan servicio cu nan ta brinda na nos comunidad y nos kier bisa nan hopi danki pa tur cos.