Despues di a scucha varios reaccion den comunidad relaciona cu e recien ahuste di prijs di gas domestico anuncia, nos ta sinti cu ta necesario pa duna mas informacion y claridad. Arugas ta consciente cu e ahuste di Afl. 20 ariba e cilinder di 100 lbs. ta afecta e consumidor.
Desde aña 2007 te cu november 15, 2022 pa motibo di regulacion Arugas mester a mantene e prijs na Afl. 42 plus BBO pa cilinder di 100 lbs. Esaki apesar cu den region prijs a subi. Despues di hopi
deliberacion y presenta cifranan, Arugas a haya aprobacion pa e prome ahuste, aumentando e prijs
na Afl. 60 pa un cilinder di 100 lbs. Sinembargo, apesar di e aumento aki, e prijs nobo no tabata
cubri e gastonan pa importacion y distribucion, lagando ainda un deficit cu a acumula di un forma
no sostenibel. Durante e añanan hopi esfuerzo a wordo haci pa keda mantene un prijs mas modera
posibel, mientras ta sigui garantisa e entrega di gas na mas di 32,000 cas cu ta depende ariba dje.
Pa ta claro, Arugas no tin monopolio. Aunke cu e mercado di distribucion di gas ta liber, Arugas ta e
unico compania cu ta distribui gas domestico. Esey ta un indicacion claro cu e negoshi pa parti
domestico no ta rendabel. Contrario na loke ta wordo menciona den media, Arugas a demostra cu
cifranan na Departamento di Asuntonan Economico (DEZHI) cu Arugas tin perdida cu e distribucion
di gas domestico.
E mercado comercial te ainda ta rendabel pa Arugas y ta permira e compania di sigui duna servicio di gas na tur cliente domestico.
Kico e cambio ta significa pa un famia promedio? E aumento ta na un nivel minimo pa por sigui
mantene e suministro di gas. Pa un famia cu ta uza 3 cilinder pa aña, esaki kiermen un incremento
di Afl. 5 pa luna.
Esaki no ta un aumento arbitrario; e ahuste ta un paso necesario pa evita cu e servicio ta bira dificil
pa sostene. Arugas, un compañía priva y netamente Arubiano, y cu ta contribui na economia di
Aruba, ta compromete pa sigui busca solucion pa mehora eficiencia den e distribucion di gas, pa
garantisa un suministro sigur y confiabel na su clientenan. Nos ta agradecido pa e comprension di
tur esnan cu ta depende ariba nos servicio, y nos ta keda disponibel pa delibera pa yega na un
solucion sostenibel.
NOTA: e cambio di prijs ta conta solamente pa clientenan domestico.
Pa mas informacion tocante e cambio di prijs y fechanan importante, por bishita nos website
www.arugas.com of nos Facebook page
