Ucrania: “Mi ta prepara pa cualkier situacion cu presenta”, Olena Mykula ta bisa na prensa.
Nos ta biba prepara pa ora cu no tin coriente cu ta wordo ocasiona frecuentemente dor di e atake nan cu misil nan di Rusia ariba Ucrania. Ucrania tin basta edificionan y luga den situacion deplorabel dor di e atake nan. Nos ta biba prepara pa cualkier situacion, el a sigui comenta.
Nan ta yuda nan mes na cas cu un bateria personal cu na momento cu tin coriente nan ta charge e y di e forma aki nan por keda conecta na WIFI, charge telefon celular entre otro. Nan ta yuda personanan cu pa e situacion actual, cu mas frecuencia ainda coriente ta bay den nan barionan. Esaki ta haci dificil pa nan por baña of laba paña y e pareha aki ta yuda e personanan aki dor di fia nan propio baño y e facilidad di nan wasmashin.
Mescos cu Olena y su casa ta yuda otro hende nan, nan tambe ta contando cu ayudo di amistad cu tin facilidad di boter grandi di gas pa nan por keinta nan cuminda nan. Asina e pueblo di Ucrania ta yudando otro pa pasa den e temporada dificil di guera, tratando di haci un bida mas normal cu ta posibel.
Mescos cu un ta yuda otro entre famia, bisiña y amistad nan, e comercio tambe ta yuda e comunidad. Apesar cu economicamente e situacion di comercio no ta bayendo den e miho direccion, e comerciantenan ta pone disponibel nan facilidad nan pa hende cu mester, por bay charge aparatonan manera telefon, computer , “powerbank” entre otro.
Ucrania ta confia den e ehercito militar cu ta proteha nan y ta spera cu pronto lo por canta victoria y cu tur e temporada dificil aki por pasa pronto pa historia.