Aunke tur aña ta keda ripiti e mes cos City Inspector lo bay traha riba un plan pa wak con por haci e pueblo cu ta celebra carnaval na banda laga menos sushi tira riba caminda segun Sr. Danilo Prescott.
Bureau City Inspector a tene un resumen, pa repasa locual tabata carnaval. Segun Sr. Prescott, tur cos a cana nechi, cu excepcion di algun kavel. Si mester bisa cu na Noord y San Nicolas trabaonan a bay basta lihe, compara cu Playa.
Tin tanto kavel ariba ruta, y toch algun a haci nan maximo esfuerso pa mantene nan kavel y rond di nan kavel limpi. E problema na Playa a cuminsa na skina Adrian Lacle Blv, unda cu a pesar cu City Inspector a parti saconan di sushi, Serlimar a pone hopi barinan ariba ruta, partidonan politico a parti cahanan, pero asina mes algun a dicidi di deposita nan sushinan ariba caminda.
Por a ripara cu kavelnan unda cu tabata tin animacion di dj, aki ta unda cu e kavelnan a keda mas sushi. Segun Sr. Prescott, Bureau City Inspector lo duna nan conseho no solamente ariba esey, pero tambe ariba palet. Aunke den vergunning ta para cu no mag di bay cu palet, pero por a ripara cu toch despues di carnaval tabata tin paletnan poni ariba ruta.