Despues cu lama a subi tera, esaki a trece basta dolor di cabes cun’e. Di parti di Bureau City Inspector, hunto cu DOW y Serlimar a drenta den accion pa asina mantene nos beachnan limpi, segun Danilo Prescott.
Bureay City Inspector ta patruyando na canto di Aruba y a ripara cu DOW y Serlimar tin ploegnan activo ta haciendo nos lama y costanan limpi y ya por mira cu e beachnan ta birando blanco, cual ta un bon señal di un bon accion.
Prescott ta sigui splica cu no ta unicamente yerba di lama tin riba beach, pero tin hopi hende cu a bay haci BBQ y awor aki tur e saconan di plastick, bek riba nos costanan. Esaki ta un problema y parce cu no tin solucion pa e problema.
City inspector si ta mustra un solucion, ta pa mantene rond dibo limpi. Bay cu bo saco, tira bo plastick, den e saco di sushi y bay cu esaki cas bek. Naturalesa mes a haci su trabao di haci limpi cual e mesun comunidad a laga bay lama. Naturalesa mes a bisa pa stop di ta porco.
City Inspector por a mira hopi hende local cu tambe ta haciendo limpiesa, aparte di coy cocolishi cu calco cu tambe ta mira cu nan ta haci. Nan ta haciendo hopi limpi. Un yamada ta bay na esnan cu kier haci algo boluntario, yuda e departamentonan di Serlimar y DOW pa yuda haci nos costanan limpi.
Tur boluntario cu kier yuda pa mantene nos costanan limpi ta mas cu bon bini. Yega, y yuda. Un man ta yuda otro y lo mantene e luga aki limpi.
Pa esnan cu kier forma un grupo pa asina duna un man den haci nos beach y costanan limpi telefon 5829777 ta number di City Inspector, caminda cu detayenan ta wordo tuma for di comunidad y apunta pa yega na e luga indica y topa cu e boluntarionan y ponenan na trabao.