Minister di Labor, drs. Paul Croes ta sumamente satisfecho cu e acogida cu CITGO Desk ta hayando mey mey di nos comunidad. Den apenas un siman di tempo, e oficina ubica na sede di DPL na San Nicolas, a ricibi CV y documento for di mas cu 500 persona.
Mientras cu CITGO Desk ta sigui habri pa atende tur local interesa den un trabou na refineria, di otro banda, ta cuminsa procesa y analisa e informacion ricibi. Di e manera aki por coordina esfuerso hunto cu CITGO Aruba, contratista y subcontratistanan pa ubica tur hende na e funcion mas adecua.
E resultado aki ta demostra cu e iniciativa di Gobierno na comienso di aña tabata completamente na su luga. Ta un placer pa Ministerio di Labor di por fungi como un mediador entre nos ciudadano y e companianan cu pronto ta bay tin mester di hopi forsa laboral. Di e manera aki tur partido ta sali gana y ta sali na defensa di e interes di e trahado Arubiano.
Francis Trimon di Ministerio di Asuntonan Social, Hubentud y Labor a duna di conoce cu ademas di esnan cu tin ya caba conocemento of experiencia den e industria petrolero, tambe tin hopi otro persona interesa pa traha den refineria ocupando puestonan, manera ‘firewatch’ y den cushina.
CITGO Desk ta tene cuenta cu e 700 ex trahador Arubiano di refineria cu a solicita for di prome instante y actualmente ta trahando den exterior. “Ex empleadonant a bin na prome luga ora di seleccion, hendenan local ta bin na di dos y, na ultimo otro solicitantenan, solamente si ta necesario,” asina Trimon a splica.
Pa medio di e palabracionnan cu Minister Paul Croes a haci cu CITGO Aruba, e compania di e refineria, su contratista y sub contratistanan mester coordina informacion di ken ta e Arubianonan cu ya a wordo tuma den servicio. Di e manera aki CITGO Desk por maneha un informacion preciso y actualisa ora di sugeri un persona pa haya trabou