CITGO Aruba Refinery ta contento di por anuncia cu durante luna di April 2017 departamento Marino y di Operacion a encarga di procesa un cantidad record di 42 barco cu a drenta y sali di nos haf. Desde 2013 e cantidad di barco cu ta haci uzo di e servicio di terminal a bin ta subi pero e luna di April 2017 ta un luna record no solamente pa e 42 barco cu a encarga di dje pero tambe tabata tin un suma di casi 10 miyon bari di petroleo cu a pasa den e area di terminal. Esaki kiermen cu durante luna di April e empleadonan marino como tambe e operadornan a percura pa move na un manera sigur e barinan di petroleo cu ta bin cu e barconan pa nos tankinan y tambe bek pa e barconan.
Esaki ta un logro grandi den e mesun dinamismo di nos hendenan cu ta trahando incansabel ariba e rehabilitacion di e refineria. Empleado y contratistanan ta dedica na e proyecto y tur cos ta canando segun e plan inicial caminda awor aki nos ta den e fase di inspeccion y definicion exacto di trabounan necesario cu start-up di e refineria den di dos mita di 2018. Mientras nos ta den e fase aki ya caba empleado y contratistanan a mobilisa y a cuminsa ehecuta e evaluacion y ingenieria detaya cu mester tuma luga riba e unidadnan di e refineria como parti di e rehabilitacion. Ademas di esaki ya caba departamentonan encarga ta cumprando e materialnan necesario pa e fase aki di e proyecto. E focus primordial na e momentonan aki ta pa planea y ehecuta e proyecto na un manera sigur y eficiente.