LOS ANGELES, Merca – E actor y activista Michael Moore diamars a lansa su website yama “TrumpiLeaks” pa asina denunciantenan por mand’e informacion tocante presidente Donald Trump y su gobierno.
Segun Moore, Mericanonan patriota cu ta traha pa gobierno, cu ta cumpli cu ley of cu ta den sector priva, cu conocimento di crimennan, violacion di e confianza publico y e mal conducta di Donald. J. Trump mester papia pa proteha Merca di tirania.
“Mi sa cu e ta riesgoso, mi sa cu nos por haya nos den problema, pero tin demasiado cos den wega pa no core risico”, Moore a agrega.
Moore, di 63 aña a bisa cu aunke niun comunicacion digital ta completamente invulnerabel, e y su ekipo a uza e tecnologia di mas safe posibel pa proteha e anonimato di e fuentanan.
“TrumpiLeaks” a wordo anuncia un dia despues cu Departamento di Husticia Mericano a bisa cu un contratista di inteligencia Mericano, di 25 aña a wordo aresta y acusa pa a filtra material secreto di National Security Agency relaciona cu interferencia Ruso den e eleccionan presidencial di 2016.
Trump a pidi pa e filtracionnan na medionan di comunicacion wordo modera.
Moore, partidario di causanan progresista y un critico ferviente di Trump, ta trahando ariba un documental riba eleccionann presidencial di 2016. Su filmografia ta inclui “Fahrenheit 9/11”, cu ta un critica duro contra di e presidencia di e Republicano George W. Bush y e gueranan na Irak y Afganistan.
Fuente: www.lta.reuters.com