Tur diasabra, desde 6 di october fundacion CINEARUBA ta presenta un otro sesion di Shortcutz Aruba y CinemaOutdoors na Ateliers ’89. E portanan di Ateliers ’89 ta habri 7.30 di anochi y e peliculanan ta incia 8’or di anochi y lo finalisa 10’or di anochi.
Teniendo na cuenta cu october ta luna di Halloween, fundacion CINEARUBA a prepara un programa special unda cu lo tin diferente peliculanan di suspense, miedo y angustia riba tur diasabra. Pa diasabra 6 di october e peliculanan lo ta Like and Share di Ronney Dotel, pelicula cortico local cu a representa Aruba na Atlanta. E pelicula largo ta El Bar di e cineasta Spaño Álex de la Iglesia, cu lo tin subtitulo na Ingles.
Durante ful e luna lo tin diferente peliculanan cortico local, riba diasabra 13 di october na e mes un ora lo inicia e actividad cu e pelicula cortico Something Horror di Robinson Nunez y despues lo sigui cu e pelicula largo Burried protagonisa pa Ryan Reynold. Riba diasabra 20 di october lo tin e pelicula cortico Alto Vista di Juan Francisco Pardo acompaña pa e pelicula largo Relatos Salvajes di Argentina, e pelicula aki lo tin subtitulo na Ingles. E ultimo siman di luna cu ta 27 di october lo tin e pelicula cortico Sin Rastro di Gabriela Croes y e pelicula largo ta High-Rise di Inglatera.
Tur e presentacionan ta riba diasabra na Ateliers ’89 cu ta situa na Dominicanessenstraat 34, net den skina otro banda di caminda di Maria College Mavo. E porta ta habri 7.30 di anochi y e presentacionnan lo inicia pa 8’or. Lo tin un popcorn gratis pa publico na tur e presentacionnan. Shortcutz Aruba y CinemaOutdoor ta wordo haci den colaboracion cu Ateliers ’89. Pa mas informacion por bishita www.fb.me/cinearuba cu ta e pagina di Facebook di fundacion CINEARUBA.