Jelitza Tromp un hoben yen di bida, lief y amigabel ta traha pa mantene e cu su wela. Su unico deseo ta, di por ta feliz. E personahe di Jelitza ta wordo interpreta pa Dana Wong.
Dana ta bay Colegio San Nicolas. E ta den klas 5 (examenklas). Atardi e ta bay gym y ta haci su huiswerk. Su hobbynan ta modela, actua, lesa buki y hangout cu su amigonan.
Door cu tabata Dana su prome biaha ta actua, e tabata dificil tin biaha pa e corda su textonan. Tiki tiki el a bin siña cu no mester corda e script for di cabes. Ta importante pa sa y comprende e contenido y djis ta natural. Un actuacion natural ta mustra hopi bunita riba screen.
E storia di Ciudad Oraño ta un storia hopi sentimental y cu e publico lo por siña hopi di dje. Dus mir’e, comprond’e y siña for di dje.
“E personahe di Jelitza a perde su mayornan y e ta pone bo realiza como persona con importante ta pa tin bo mayornan den bo bida vooral bo mama, pesey stima y balora bo mama, bo mama ta e persona cu semper lo tey pa bo no matter what. E amor di mama ta unico. Purba papia cu ne y splic’e con bo ta sinti. Confi’e, e semper lo tey pa scucha bo y duna bo conseho. E nunca lo conta otro hende bo cosnan. Bo mama ta bo amiga, bo mama semper lo kier e miho pa bo. E amor di un mama nunca lo caba. Mi kier a tuma momento pa gradeci mi mama Carmen Parra cu semper ta cu mi cada momento di mi bida y cu lo duna su bida pa mi. Cu ta apoya mi y cu ta yuda mi logra tur mi soñonan. Danki pa ta mi amiga. Mi stima bo hopi.”