HANOI, Vietnam- Dia 1 Februari, 1968, e guera di Vietnam no tabata mustra señal di cu final lo por tabata cerca. Un potret saca den e antiguo Saigon, actualmente Ho Chi Minh, a inmortalisa e conflicto y a provoca un ola grandi di antibelicismo na Merca.
Eddie Adams, fotograaf di e agencia di noticia Associated Press, a press e boton net prome cu e bala a pasa door di e cabes di un prizonero di Noord- Vietnam, geboei y deteni pa e soldaatnan di Zuid- Vietnam. E suceso a tuma luga den pleno lus di dia dilanti un gran cantidad di testigo y a refleha e crueldad cu ambos partido tabata uza pa control di teritorio.
E asesinato di e gueriyero di Vietcong, Nguyen Van Lem na man di e hefe di polis di Zuid- Vietnam, Nguyen Ngoc Loan, a bin durante un atake sorpresa conoci como e ofensivo di Tet, cu a tuma luga for di e parti Noord durante un tregua pa motibo di e Aña Nobo Lunar Vietnamita.
“Ami tabata e unico di mi batayon cu a sobrevivi e anochi ey, tur otro a wordo ehecuta”. Asina e septuagenario Nguyen Duc Gan, cu a lucha contra di e ehercito Norvietnamita ora cu e asalto a cuminsa, dia 30 Januari 1968.
E combatientenan di Vietcong, “no tabata bon arma, nan tabata uza cuchiu pa mata e polisnan,empleadonan publico y civilnan”, segun Nguyen Duy Dang, cu ta dirigi un tienda den e bario di Cholon. E tempo ey e tabata tin 13 aña.
E potret di e asesinato aki a bay compaña pa un video cu Vo Suu a graba. Suu tabata un camarografo di e cadena NBC. Den un para di dia e imagennan a bay tur rond mundo. Esaki a contribui na e nacemento di un movemento pacifista cu a pone e participacion di Washington den e guera bou di control como tambe su apoyo na Zuid- Vietnam.
Na 1975, e derota di Merca tabata un golpi fuerte pa su poderio militar y su reputacion internacional, mientras cu China y Union Sovietico a wordo bon mira pa apoya e banda vencedor.
Di otro banda, Vietnam a tarda casi dos decada den cuminsa drecha su infrastructura teritorio y ta ser calcula cu casi 10 miyon persona a wordo desplasa door di e conflicto.
E general cu a caba cu e bida di e guerrillero Norvietnamita tabata obheto di gran desacreditacion, pa cual el a emigra pa Merca. Na 1991 a sali na cla cu e tabata biba na Virginia pero 7 aña despues el a muri di cancer na edad di 67 aña.