Diamars, 2 di october e Major League Baseball play-off’s lo cuminsa. E bataya anual pa un luga den e World Series, unda cu lo bay pa e titulo maximo den baseball. E aña aki, un total di 5 hungado di Reino Hulandes lo ta disputando e titulo maximo cu nan ekipo. Ta trata di e yiu di Corsou, Didi Gregorius, Jonathan Schoop, Kenley Jansen y Ozzie Albies como tambe e Arubiano Xander Bogaerts.
Xander Bogaerts cu Boston Red Sox a kibra record di weganan gana (106) y ta lidera e ekiponan cu esey. Didi Gregorius y New York Yankees a termina nan temporada cu 100 wega gana y a keda na di dos luga tras di Boston den American League Eastern Division. Nan mester hunga pa e ‘wild card’ contra Oakland Athletics pa postula nan mes pa e prome ronda oficial di e playoff (Division Series). Manera cos ta awo, e por nifica cu Yankees por topa nan rival di tur tempo, esta Boson Red Sox. Cleveland Indians y e ekipo cu tin cu defende su titulo, y Houston Astros ta otro dos ekipo den playoffs den American League.
Pa loke ta Liga Nacional, tin Atlanta Braves cu Ozzie Albies, cu a bira e ganado di e Eastern Division. Jonathan Schoop (Milwaukee Brewers) y Kenley Jansen (Los Angeles Dodgers) tambe ta poni pa playoffs. Un otro punto interesante ta cu Dodgers y Colorado Rockies den National League West tambe tin e mesun cantidad di wega gana, esta 9.
Pa prome biaha den 115 aña, tin un situacion den cual 4 ekipo tin cu hunga un wega decisivo pa determina cua ekipo ta gana e division y cua ekipo lo hunga diamars anochi pa e wild card.
https://www.honkbalsite.com/2018/10/01/vijf-spelers-uit-koninkrijk-der-nederlanden-in-mlb-play-offs/