Desde aña 1994 ta celebra “World Teachers’ Day” riba dia 5 di october. Un fecha asigna pa promove e profesion Maestro di Scol y pone atencion na su rol esencial pa provee enseñansa di calidad riba tur nivel, segun UNESCO y Education International.
Na Aruba, alrededor di 1400 Maestro y Docente ta dedica nan mes na enseñanza y educacion di nos yiunan. Un trabou importante y bunita, pero tambe di hopi responsabilidad y cu hopi reto. E Maestro di Scol awendia tin un rol hopi mas amplio cu solamente para dilanti klas y traspasa conocemento. E mester duna guia, ta un bon ehempel, motiva y inspira e alumno mientras cu e sa traha cu recurso minimo y mester competi cu tecnologia moderno.
Awe, na ocasion di World Teachers’ Day, Departamento di Enseñansa Aruba (DEA) ta uni su mes na organisacionnan rond mundo cu ta celebra, felicita y gradici e Maestronan di Scol pa nan valioso trabou.
“Dia di maestro ta un dia pa celebra, un dia pa reflexiona, riba ken bo ta, y ken bo ta inspira, un dia pa nos corda cu nos ta crea e hendenan di Aruba.”
– Anne-Marie Proveyer-Groot, director DEA
Mensahe di Minister di Enseñansa di Aruba
“Riba dia 5 di october mundo henter ta celebra dia mundial di maestro. Mi ta felicita cada un maestro, docente y actor di sosten cu ta traha den Enseñansa. Mi kier no solamente felicita nan, pero mi kier gradici nan pa nan contribucion, dedicacion y esfuerso diario pa duna e miho enseñansa pa nos studiantenan. E no ta e trabou di mas facil y tampoco kisas semper ta scucha danki, pero awe rond mundo, e trabou di e maestro ta wordo reconoci y elogia.
Dia di Maestro ta un dia reconoci pa nacionnan uni desde 1994 pa honra e profesion di tur esunnan cu ta traha den Enseñansa. E aña aki e tema ta Libertad di Educacion, empoderando maestronan. E trabou di maestro realmente ta un “yamada” y un bon maestro no solamente ta yuda studiante siña, pero ta inspira, ta yuda descubri tesoro personal y ta saca lo maximo di cada un di su studiantenan.
Pabien na un y tur y Danki pa a scoge e profesion di educador!”