Awe 10 di october ta Dia di Salud Mental. Fundacion Anti Droga Aruba [FADA] hunto cu Respaldo ta para keto un rato pa refleha riba e tema importante aki. Nan ta trece dilanti cu a yega un tempo unda cu nos bida diario a cambia considerablemente hopi debi na e pandemia di Covid-19.
E ultimo lunanan aki a trece hopi retonan pa nos frontliners, unda cu mester brinda servicio bao di cualkier circumstancia, bay trabao maske por tin miedo di trece Covid-19 cas pa nan famia, pa studiantenan, adaptando na tuma les for di cas of Online, tin poco contacto cu docente/amistadnan y ta concerni ariba nan futuro. Pa trahadonan cu miedo di perde trabao, cifranan halto di personanan sufriendo cu entrada menos, personanan cu problema di salud mental ta experienciando un pio isolacion di loke nan ta biba diariamente.
Sin lubida esnan cu ta sufriendo den silencio cu perdida di un ser keri, sin cu por a bisa ayo y no por tin nan famia cerca pa consuelo. E consecuencianan ariba economia debi na e pandemia ya ta wordo sinti, companianan cu mester laga empleadonan bay cas pa purba salba nan negoshi y tin hasta cu mester cera por completo. Mirando experiencianan den pasado, ta premira cu e cifranan di salud mental lo aumenta den e siguiente luna y añanan segun e dos fundacionnan ta trece dilanti. Awor mas cu nunca ta ora pa nos para keto y mira e importancia di salud mental
No keda keto, busca ayudo cerca profesionalnan cu ta cla pa sirbi y yuda nos comunidad. Esaki ta e motibo cu e aña aki World Health Organisation a concentra riba #MENTALHEALTHFORALL