Partido AVP a tene su conferencia di prensa caminda Sr. Marlon Sneek a cuminsa na felicita e hobennan cu a gradua den e prome intento. Esunnan cu haya un chens mas mester probecha di e chens aki. Sr. Marlon Sneek di AVP a splica cu a analiza e cifranan di e resultado y nan ta alentador.
Comparando e prome y di dos intento di aña pasa cu esunnan di e aña aki, den e prome intento so, ta mustra cu, vooral EPB Oranjestad a bay hopi dilanti. Aña pasa nan tabata tin 83% den e prome intento y ainda falta e muchanan cu ta haci her- examen. Pa loke ta EPB San Nicolas, aña pasa nan tabata tin 68%, y e aña aki, ya caba nan ta na 75%. Pero ainda falta e resultado di her- examen pa bin acerca. E scolnan di MAVO tambe tin porcentahenan basta halto. Tin ainda un tiki preocupacion den HAVO/VWO. E cifranan a keda casi mesun cos di aña pasa y Colegio San Nicolas tin un porcentahe basta abao.
Pa loke ta e MAVO di Noord, Ceque College, un 84% di nan candidatonan a slaag. CEque cu a crece for di un dependance, despues el a haya su autoridad total y awor e tin tur su klasnan for di prome te cu di 4 klas. Despues di dos aña e ta dunando bon resultado. Aña pasa nan tabata na 68%, e aña aki ta 84% den e prome intento. Un palabra di pabien pa tur e hobennan. Y na esunnan cu ta den e periodo ainda cu nan mester haci nan her-examen, traha duro pa asina garantisa pa dia di entregamento di diploma y asina prepara pa e siguiente meta cu bo tin den bida, segun parlamentario pa AVP, Sr. Marlon Sneek.