Boneiro: Kuerpo Polisial Hulanda Karibense ta presentá e sifranan di kriminalidat i tráfiko di e promé mitar di 2019 ku e meta pa abitantenan di Boneiru haña un bista di desaroyonan riba nos isla. Pa duna un mihó bista ta kompará e sifranan di mitar aña di 2019 ku e sifranan di aña pasá durante e mes un periodo i durante hinter aña pasá.
E delitonan kontra propiedat i poseshon ( delitonan kaminda e sospechoso ta enrikesé su mes dor di kometé un delito), por mira un bahada di 19 kaso si kompará e sifranan ku e promé mitar di 2018.
Ladronisia di otro tipo a baha di 97 insidente registrá te ku yüni di 2018 na 66 kaso registrá te ku yüni di 2019. Tambe ladronisia di vehíkulo (outo, bus i trùk) por mira un bahada. Durante di e promé mitar 2018 a registrá un total di 12 kaso i pa e promé mitar di 2019 a registrá apensa 2 kaso. Esaki ta nifiká ku den e promé mitar di 2019 tabatin un bahada di 83% di ladronisia di outo si kompará esaki ku sifranan di e mes un periodo den e aña promé.
Pa loke ta trata delitonan ku violento te ku yüni 2019 a registrá 115 kaso. Durante di e mes un periodo na 2018 a registrá un kantidat di 110 kaso. Na 2018 i 2019 a registrá un total di 8 atrako den e promé mitar di aña.
Den e sifranan di tráfiko por mira ku a registrá un total di 622 aksidente. Esaki ta un subida di 13.5% si kompará esaki ku e kasonan registrá di yanüari te ku yüni di 2018. Ku introdukshon di e ordenansa di lei di tráfiko riba promé di ougùstùs 2019 Kuerpo Polisial ta spera ku e kantidat di aksidente di tráfiko ku konsekuensia fatal, ku herido i ku daño material lo baha.
E enfoke di Triángulo Boneiru pa e sobra lunanan di 2019 lo ta partikularmente riba kambionan di e ordenansa di lei di tráfiko ku a drenta na vigor dia promé di ougùstùs último. E prioridat ta prinsipalmente riba manehá vehíkulo bou di influensia, telefòn selular den man na momentu ku ta stür, uso di faha di siguridat i uso di hèlm na momentu ku ta kore skuter, bromfiest, i bròmer.