Segun resumen di awe 43 persona a recupera y un total di 42 caso nobo di COVID-19 a keda registra cual 2 ta no-residente y 40 ta residente. E cifranan aki ta representa un ‘Positivity rate’ bou di nos residentenan di 18%.
E cantidad di casonan activo di COVID-19 pa awe ta 477 y cantidad di fayecidonan relaciona cu COVID-19 a aumenta na 153 cu morto di 2 residente cu tawata interna den hospital na Aruba. Forsa na famia di e fayecidonan. Datos ta ilustra casonan nobo di COVID cu un average semanal di 42 caso pa dia y un averahe di ‘positivity rate’ semanal di 20% pa dia.
Actualmente na Aruba tin 36 persona interna debi na COVID di cual 10 ta den ICU y 26 riba piso general y na Colombia tin actualmente 24 persona den Cuido Intensivo.
DATOS;
For di comienso di juli cu DELTA a haci su introduccion na Aruba por observa cu lamentablemente 45 persona a perde e bataya contra e virus di COVID-19 di cual 7 tawata vacuna y 38 no tawata vacuna. Den e graficonan adhunto di awe por observa e cantidad di fayecidonan y nan respectivo edad na momento di nan morto desde comienso di juli 2021.
RECORD
Informacion cu MasNoticia a logra haya ta mustra cu den luna di augustus Aruba a conoce un cifra record di fayecidonan.
Un total di 107 persona a fayece den luna di augustus, di cual gran mayoría no ta relaciona cu COVID. E persona di mas edad a fayece tres dia prome cu el a cumpli 100 aña y esun di mas hoben tabatin 33 aña. Di e total di 107 fayecidonan, 51 tabata hende muhe.
Aruba nunca antes a conoce un cifra asina halto di fayecidonan den un solo luna. E cifra mas halto conoci di ultimo tempo tabata na mei 2016 ora cu a registra 80m fayecido.
Hopi di e hendenan cu a fayece, cu no ta pa motivo di COVID, ta riba 60 aña. E por ta un indicación cu nan no tin acceso na cuido debi cu tur atención e ultimo aña ta riba COVID. Y cu transcurso di dia y simannan e salud ta sigui bay atrás. Ta tarda hopi pa haya cita cu specialista y haya cita pa haci testnan. Tur esaki a consecuencia di COVID.