Directora di Departamento di Recurso Humano, Omaira Lares, ta duna splicacion tocante e ultimo desaroyonan cu ta pasando cu e posicion di ambtenaarnan y e motibo tras di e tardansanan cu tabatin.
DRH a tuma nota di e declaracionnan di Sindicato TOPA y lo sinta cu nan den e proximo simannan pa informa nan tocante e lista cu lo tin stukken pega cu DRH. E trabounan tabata duro pa DRH, segun sra. Lares, pasobra hendenan ta kere cu nan por haci extra peticionnan of ora un Gobierno nobo subi nan por bolbe haci un peticion pa revisa e peticionnan bieu. Esey ta haci cu e ultimo aña, DRH tabatin hopi mas stukken cu normal. Normalmente nan ta haya 500 pa 800 stukken pa luna y awor nan ta hayando 1,500 pa 2,000 stukken. Esaki ta haci’e dificil pa nan saca tur hunto. Tin documentonan cu ta tuma su tempo pa motibo cu falta informacion y mester investiga. Na cuminsamento di aña DRH tabatin un peso grandi di trabou cu mas o menos 5,000 stuk. Nan a confronta tambe cu stukkennan cu tabata hopi mas complica e ultimo lunanan aki. Pero mayoria stukken a wordo atendi cun’e caba, incluyendo e parti financiero.
Sra. Lares ta splica cu ora un ambtenaar ta dos aña AO, ley ta obliga pa baha su salario cu 90 porciento. Esaki no ta cay pa terugwerkende kracht. Banda di esey, tin e grupo di hendenan cu ta meld ziek tur luna pa cual ley tambe ta duna e posibilidad pa baha nan salario cu 90 porciento. Esaki yama ta un punto nobo den e beleid cu yama samengestelde ziekteverzuim. Esaki a sosode den luna di mei, pero DRH a faya den informa e hendenan aki y a haci e proceso pa paga nan bek.