DEN HAAG- E Comision den Tweede Kamer pa Asuntonan Di Reino kier informacion di Secretario di Estado, Sr. Raymond Knops di Asuntonan di Reino y di Minister Stef Blok nan reaccion pa loke ta e ceramento di e frontera di Venezuela cu islanan ABC.
Riba propuesta di Ronald van Raak (SP) e comision a dicidi pa diaranson den un reunion di procedura pa manda e ministernan un carta unda cu nan ta duna nan opinion ariba e situacion aki y kico ta nan plan pa asina logra kita e blokeo. Van Raak a bisa cu nan ta lamenta cu e oferta di Corsou pa hunga un rol den entrega di e ayudo humanitario na Venezuela ta wordo politarisa door di presidentenan Maduro y Trump.
Ministerio di Asuntonan Exterior despues den su declaracionnan di diamars anochi a bisa cu e no a haya un confirmacion oficial di parti di autoridadnan na Caracas. Riba peticion di Comision di Tweede Kamer pa Relacionnan Exterior lo bay den un debate cortico cu minister Blok riba e crisis di Venezuela. Mirando e ultimo desaroyonan, probablemente e cierre di e frontera tambe lo bin na ordo di dia.