WASHINGTON D.C., Merca – E campaña di Hillary Clinton a yega na peticion di un cantidad considerabel di cientifico informatico pa nan pidi un recuento di e votacion total na Wisconsin, Michigan y Pennsylvania, segun un fuente cu conocemento di e hechonan.
E cientificonan aki ta kere cu nan a haya evidencia segun cual e votonan total den e tres estadonan aki por a wordo manipula of gehacked y a mustra nan hayasgonan na e alto representantenan di Clinton diahuebs utlimo.
E expertonan entre nan, J. Alex Halderman, director di e Centro pa e Siguridad Informatica y e Sociedad di Universidad di Michigan, a bisa na e ekipo di Clinton cu nan ta kere cu ta cuestionabel cu e candidato Democrata tabata tin un pio desempeño den condadonan cu mashinnan di votacion electronico den comparacion na esnan cu a uza formulario di votacion y scannan optico, segun e fuente.
E grupo a informa John Podesta, director di campaña di Clinton y Marc Elias, secretario general di e campaña, cu e exsecretaria di Estado a ricibi un shete porciento menos di voto den condadonan cu mashinnan di votacion, di cual nan a sigura cu nan mester a wordo gehacked.
Cientificonan informatico a bisa Podesta y Elias cu aunke nan no a haya evidencia di hackeo, tin mester cu e tenencia aki wordo revisa pa un investigacion independiente.
Ni Halderman of John Bonifaz, un abogado cu tambe ta presionando den e caso, ta responde na pedidonan di comentario den e mainta di diamars. Nan peticion a wordo reporta na prome instancia pa e revista New York.
Un mensahe laga pa e ekipo di transicion di e presidente electo, Donald Trump, tampoco a wordo respondi di manera inmediato. Den transcuros di e campaña tabata tin hopi preocupacion di posibel hackings, incluyendo acusacionnan di e administracion di Barack Obama contra Rusia pa purba di viola datonan di e registro electoral. Pero funcionarionan electoral y expertonan den cibersiguridad a bisa cu na principio di luna cu tabata virtualmente imposibel cu e Rusonan lo influencia den e resultadonan di e eleccion.
Un exasistente di Clinton a nenga di responde preguntanan riba si nan lo solicita un audit basa den e hayasgonan aki.
Adicionalmente, por lo menos tres miembro di e Colegio Electoral a compromete na no vota pa Trump y na busca “un alternativa Republicano rasonabel pa eligi presidente” atrabes di e isntitucion aki, segun un pronunciamento haci diaranson pa un grupo denomina Hamilton Electors, cu a present’e.
“E Tatanan Fundador a crea e Colegio Electoral como un ultimo liña di defensa,” e elector Michael Baca, a bisa den un pronunciamento. “Mi ta pensa cu nos mester haci tur posibel pa sigura nos pa tin un candidato Republicano rasonabel cu ta comparti nos balornan Mericano.”
Fuente: CNN en Español