PARIS, Francia – E sonrisa di Mona Lisa, un tema cu tabata obheto di debate, investigacion y abundante literatura durante varios siglo, a keda colga cu un investigacion di neurociencia cu a sentencia cu su expresion facial sin duda, ta signo di felicidad.
E inusual investigacion a puntra na e participantenan riba e motibo di e expresion facial di e modelo di e cuadro di Leonardo da Vinci y un 97% a responde cu Mona Lisa a wordo precibi como un persona “feliz”.
“Nos a keda sorprendi”, e experto den Neurociencia, Juergen Kornmeier di e Universidad di Friburg, na Alemania a bisa AFP diabierna.
Kornmeier y su ekipo a uza un di e obranan di arte mas famoso di mundo pa studia con sernan humano ta percibi signonan visual manera e expresion facial di un persona.
E Gioconda hopi biaha ta wordo considera como un simbolo di enigma emocional, cu un gesto cu na prome bista ta mustra un sonrisa dushi, pero despues ta revela un chispa cu ta parce un burla of hasta ta alberga un aire di tristesa for di lo mas leu.
Pa e estudio, e ekipo a uza un copia blanco cu preto di e cuadra di siglo XVI, cu a wordo altera pa genera ocho version cu lo ta bay for di un mayor grado di “felicidad” na un tono mas tristo.
E nuebe imagennan a wordo mustra na e 12 participantenan den 30 ocasion, cu mester a wordo cataloga.
“Debi na e descripcionnan di arte y di e historiadornan di arte, nos a pensa cu e original lo a bay ta mas ambiguo,” Kornmeier a splica. En cambio “pa nos asombro, nos a descubri cu e original di Da Vinci a wordo percibi como (…) feliz” den un 97% di e casonan.
E descubrimentonan aki por ta releventa pa studia varios desorden psikiatrico, Kornmeier a splica y den un di dos etapa lo a midi e resultado den pashentnan cu ta sufri di enfermedadnan mental.
Otro descubrimento interesante ta cu personanan ta identifica nan mes mas rapido cu e Mona Lisa contento compara cu e versionnan tristo.
Esaki ta sugeri cu “por tin un leve preferencia (…) den sernan humano pa felicidad,” e experto a bisa.
Ora di a puntra riba e piesa di arte, e ekipo a contesta cu su trabao ta duna un respuesta na un pregunta cu ta hiba siglonan sin contesta.
“Por tin cierto ambiguedad den otro aspectonan,” Kornmeier a bisa, pero no tin ambiguedad den e sentido cu si e ta feliz of tristo.
Fuente: AFP