Astronomonan a descubri den e constelacion Big Bear un strea ‘zombi’, extremadamente inusual ya cu el a sobrevivi varios explosion di Supernova. E ta revela estudionan cualnan a wordo publica den e revista Nature.
Ora cu e supernova iPTF14hls a wordo observa pa prome biaha na September 2014, astronomonan na California, Merca a pensa cu e tabata completamente normal. Supernovanan ta forma como resultado di e explosion di streanan gigante. Pero, ora di analisa e explosion di iPTF14hls, cientificonan a detecta algo cu nunca nan a yega di observa prome.
Normalmente, un supernova ta briya durante 100 dia prome cu e disparce. Pero iPTF14hls tabata ilumina y despues bira scur sin stop durante 600 dia. E autor principal di e estudio, Iair Arcavi, a confesa di a pensa “cu mester ta trata di un strea cercano, di nos galaxia”. Pero ora cu nos a haya e prome spectrum nos a wak cu en realidad ta trata di un supernova situa na 500 miyon aña lus di distancia. El a lagami sin palabra. Nunca nos a yega di wak un supernova comporta su mes asina ey”, el a bisa.
Astronomonan a dicidi di revisa e datonan di archivo y a descubri cu e mesun strea ey a explota na 1954. Pero el a sobrevivi na e evento ey. Y mei siglo despues el bolbe explota y a bolbe sobrevivi. “Esey kiermen cu ainda nos tin mas pa siña encuanto con e streanan ta evoluciona y con e streanan masivo ta explota”, Arcavi a destaca.
“E supernova aki ta pone un fin na tur loke nos tabata pensa cu nos tabata sa tocante su comportamento. E ta e puzzel mas grandi cu nos a yega di haya den casi un decada di estudio di explosionnan estelar”, segu
n e autor principal di e estudio, Iair Arcavi.
Fuente: https://actualidad.rt.com/