Washington, D.C., MERCA- Un asteroid grandi ta rumbo pa planeta Tera, pero no ta necesario pa busca refugio.
E piedra di espacio, conoci bou di e nomber di 2014 JO25, lo pasa sin peliger cerca di Mundo dia 19 di April, segun NASA. Posibilidad di cu e dal den nos planeta y caba cu humanidad? Cero, segun expertonan.
“Aunke tin cero posibilidad di cu e asteroid dal contra di nos planeta, ta trata di un acercamento grandi pa un asteroid di e tamaño aki”, segun NASA.
Kico ta su tamaño? E medidanan haci door di NASA ta indica cu e asteroid ta midi 650 meter, cu ta ekivalente na 6 veld di futbol Mericano.
Segun NASA e asteroid aki lo yega cerca di nos planeta, na 1.8 miyon km leu. Esaki ta 4.6 biaha e distancia di Mundo pa luna. E luna, por cierto ta na 384.400 km leu di nos planeta.
Aunke varios asteroid di sizenan mas chikito a pasa na cierto distancia di nos planeta varios biaha pa siman, esaki ta un asteroid di e tamaño aki of mas grandi cu lo pasa cerca, den e ultimo 13 añanan, despues cu e asteroid Toutatis na 2004, segun e agencia espacial.
E asteroid lo tin un superficie reflehante cu kisas e lo ta visibel cu’n telescoop.
“E asteroid lo yega cerca di nos planeta desde e posicion di solo y e lo ta visibel den e cielo nocturno despues di 19 di April”, segun NASA.
Astronomonan a descubri e asteroid, 2014 JO25 tres aña pasa (si, na 2014). Esaki lo ta su encuentro mas cercano cu Mundo den e ultimo 400 añanan.