SAN JOSE, Costa Rica – Corte Interamericano di Derechonan Humano (CIDH) diabierna a informa di un sentencia unda cu Estado di Venezuela ta wordo haya culpabel pa un serie di negligencia y violacionnan di derechonan den e caso di Linda Loaiza Lopez Soto, cu a wordo secuestra, tortura, mutila y viola na 2001.
Corte Interamericano a haya estado Venezolano “responsabel pa e hechonan di tortura y violacion sexual sufri pa Linda Loaiza Lopez Soto, den violacion di varios disposicionnan di e Convencion Americano riba Derechonan Humano, e Convencion Interamericano pa preveni y sanciona tortura y e Convencion Interamericano ap Preveni, Sanciona y Eradica Violenca contra di Hende Muhe”, e tribunal a splica.
E hoben a wordo secuestra dia 27 di maart 2001 tempo cu e tabata tin 18 aña, te ora cu, casi cuater luna despue, dia 19 di juli di e aña ey, el a wordo rescata pa autoridadnan den condicionnan pesimo di salud.
Huesnan a haya cu ta proba cu durante e periodo cu e tabata secuestra, Lopez Soto “a wordo someti di manera continuo na varios actonan di violencia fisico, verbal, psicologico y sexual, incluyendo e ingestion forsa di alcohol, droga y remedi, privacion di cuminda, varios violacion vaginal, anal y cu obhetonan”.
E sentencia ta agrega cu e muhe tabata victima tambe di “golpinan cu e a provoca hersenschudding, pleki blauw na su cara, trauma su oido, su torax y bariga, su nanishi a wordo kibra y como tambe su kaak, entre otro”.
Despues di su rescate, Lopez Soto a wordo opera 15 biaha y keda interna den hospital pa un aña.
Responsabilidad di estado ta “bin di e reaccion insuficiente y negligente di funcionarionan publico cu, ora cu a tuma nota di e risico, no a adopta e medidanan cu normalmente ta wordo tuma, pa cual nan no a cumpli cu e diligencia debido pa preveni, sino cu ademas su manera di actua a causa alerta na e agresor’.
Den e proceso penal interno di Venezuela tabata tin dos huicio oral, ya cu e prome a wordo anula. Den e di dos, e agresor a wordo condena pa delito di privacion di libertad y lesionnan grave, pero absolvi di e delito di violacion.
Actualmente, e proceso pa loke ta e delito di violacion ta pendiente.
Huesnan a duna ordo na estado pa sigui cu e proceso penal interno pendiente pa tortura y violacion sexual, investiga menasanan sufri pa e victimanan y garantisa su siguridad, como tambe determina e eventual responsabilidad di funcionarionan cu no a investiga e caso na prome instante.