Pasco a yega den e comunidad di Tanki Flip. Recientemente señor Giovanni Atencio, Country Manager di CIBC First Caribbean conhuntamente cu señor Luis Oduber Director General di WEB Aruba a cende e switch pa asina ilumina e rotonde di Tanki Flip cu luznan colorido y decorativo di pasco.
CIBC First Caribbean a cuminsa nan operacion recientemente na Aruba y ta feliz di uni su mes cu WEB pa ta parti di e evento cultural aki pa asina fortalece e vinculo cu e comunidad di Aruba door di cende e luznan na e rotonde di Tanki Flip.
Señor Atencio a bisa di ta hopi gradici na e bario pa e forma con nan a ricibinan y pa laga e banco sinti y ta parti di e famia di Tanki Flip. Tambe señor Atencio a desea e comunidad feliz dianan di fiesta y tur bos pa e aña venidero.
Señor Luis Oduber Director General di WEB Aruba a informa cu nan ta celebrando nan prome lustro decorando e rotonde di Tanki Flip. El a gradici e comision di decoracion pa e tremendo trabou cu nan a haci, incluyendo e anochinan largo preparando y decorando.
“E resultado di e bunita decoracionnan por wordo aprecia ora e luznan cende y asina por aprecia e palabranan di Paz, Amor, Joy y Dicha ilumina. Ban celebra e ultimo dianan cu amor y hunto manera un gran famia.” Tabata e palabranan di señor Oduber. E tambe a desea e audiencia y e comunidad di Aruba feliz dianan di fiesta y un prospero 2017.
E comision decorativo a duna algun splicacion di e decoracion. Asina por mira belanan front di e rotonde cual ta significa paz den e organisacion y entre coleganan, pero tambe den e comunidad di Aruba. E palabranan cu ta ilumina ta papia pa nan mes. Esaki ta loke e dos organisacionnan aki ta desea e comunidad di Aruba pa e aña venidero. E comision sigur kier gradici un y tur cu di un forma of otro a yuda.
E anochi a termina cu e ambiente musical di Gaita Autentico. Tur hende presente a disfruta di e anochi y e grand musica como tambe di e bunita decoracion.
Feliz dianan di fiesta y e miho deseonan pa e aña nobo ta bin di parti di CIBC First Caribbean y WEB Aruba.