Chu Halabi ta conoci den e mundo di deporte y diabierna anochi durante e evento di Premio Excelencia den Deporte 2016, e comision a honra su persona pa tur su añanan cu el a sa di dedica su tempo den deporte. Halabi a ricibi un plakkaat e anochi aki hunto cu 9 otro baluarte, kendenan tambe a percura pa deporte di Aruba bay dilanti, sea cu nan a dirigi esaki of practica deporte.
“Pa mi e ta un honor hopi grandi, mi ta un hende emocional. Eigenlijk mi no ta gusta e cosnan aki mes, e ta un satisfaccion, pasobra bo a haci sacrificio, bo a laga bo famianan atras na cas, bo ta train, despues di caba di hunga bo ta dirigi. Un cos cu mi ta sinti cu mester haci mas. Mester tin pa reconoce, pasobra tin mas hende cu a haci mas, eigenlijk e tabata ta un shock pa mi ora cu nan a bisa mi cu mi tin di bini. Den mi curason mi ta hopi gradicido. Mi no ta haci nada pa mi no haya nada bek, pero mi ta spera cu por ta un mucha bay na su mayornan y puntra ken e meneer ey tabata ta, anto por ta e mayor splik’e ken mi ta y kico mi a haci esey por inspir’e loke mi a haci y e por haci’e hopi mas miho.”
Chu Halabi ta conoci den e mundo di deporte di baseball unda cu el a yega di firma 52 hoben beisbolista. Aunke cu el a firma muchanan pa hunga baseball y no yega asina leu, e ta mas contento pa tur e muchanan cu a pasa bou di su man cu a bira Dokter, Polis, Abogado, cu a bira un bon tata na su cas.
“Ora ami tabata hunga mi tabata hunga cabes loco, pero semper mi a purba respeta wega, respeta loke ta rond di mi. Pero ora mi a bira dirigente, mi meta tanto na scol como ora mi tabata train mucha, prome luga tabata cu mi ta traha un bon ciudadano, un bon Arubiano. Esey tabata prome. Mi kier pa bo bira un bon hende, y asina na caminda nos haya un bon big leaguer ta meegenomen. Pero mi ta siña bo norma y balornan pa bo funciona adecuadamente cu respet den bo comunidad.”
E orguyo pa Chu Halabi ta pa mira e mucha cu tabata train baseball bira un Arubiano ehemplar. E baluarte ta remarca cu e mester ta orguyoso di e mucha, pero e mester bira un Arubiano ehemplar, un hende trahado, un hende dedica, un bon tata di famia, un bon yiu. Esey ta loke hopi biaha e ta boga pe. “Hopi biaha mi a bisa si bo no ta un bon hende, bo no tin un bon caracter, bo por bira un bon atleta pero bo no ta dura hopi.”
Un conseho cu Chu Halabi a duna na e atletanan ta cu si bo kier bira un atleta, e no ta facil. “Tur mucha tin soño, dus soña. Bo mester soña cu bo mester algo. Mi a splica Randolph cu bo no ta hungando pero sigui soña cu un dia bo ta yega big league. Mi tata no kier a firma pa mi, pero ora mi a papia cu mi mester yega, mi a yega tambe pero no como hungado sino coach. Ami a yega mi meta. Pero un mucha mester por soña un mucha mester pone meta dilanti. Wak ora bo pone bo metanan kico ta importante pa bo yega, kico bo mester pa bo yega bo meta.”
E prome cos cu mester pa yega na un meta ta disciplina. Respeta bo mes, tende di mayornan, cuida bo curpa, alimenta bo mes bon. Studia, scucha na scol, pasobra den tur deporte ta rekeri cierto inteligencia. “Por ta bo no tin un inteligencia den wiskunde, pero bo inteligencia cu bo a desaroya na scol door di bo habilidad nan creativo den handenarbeid, den muziek of den gymnastiek por yuda bo resolve problemanan”. Pa Chu Halabi, e hende of mucha mester ta un hende dedica, zorg pa tin su meta y purba na logra nan na e maneranan mas sano cu ta posibel y respeta tur regla.
Conseho pa esunnan cu kier bira dirigente mester sa cu e ta hopi sacrificio. Si no tabata pa Mama Iris, pa su yiunan cu a permiti Chu Halabi bay afo pa 6 aña y bin bek dos biaha pa haci deporte. E ta bira un cos duro. Ora bo ta bay bira un coach, bo mester sa e ta bay costa sacrificio. Pero asina mes e ta un sacrificio cu e ta bay causa bo, e ta bay causa otro hende tambe. Zorg pa semper bay tin sikiera ta 5 minuut, 5 minuut di calidad pa bo famia. Anto wak pa bo bira e persona di mas miho.
“Bo no ta bira un coach si bo no studia. Bo no por bira un coach si bo no a dicidi di busca informacion pa bira mas miho. E cos di mas importante ta pa wak bo respeta bo atletanan, wak pa bo duna nan bon guia, corda di hiba nan den e bon caminda y corda cu bo no t’ey pa nan bira campeon. Bo t’ey pa nan bira bon atleta, bira un bon ser humano. Si bo tene eseynan na bista anto educa bo mes, bay curso, scucha di otro hende, bo lo bira bon coach. Pero e prome cos si ta cu si bo yega eynan djis pa fama y bo kier gana un par di wega, e ora ey bo ta fout bezig y bo no ta bay produci nada,” asina Chu Halabi a termina bisando.