Diadomingo 4 di December a tuma lugar e grandioso Christmas Bazaar na Centro di Bario Savaneta, organisa pa e Directiva y Boluntarionan. Un atardi ameno unda un y tur por a gosa di e ambiente navideño.
Na e Christmas Bazaar a participa un total di 14 mesa cu a trece un variacion di articulonan manera obra di man, cos di hunga, giftbasket, productonan Avon y como tambe joyas. No a keda falta e cosnan dushi manera: bolo, cupcake, kuki, dulce de leche, tert y ponche crema. Fun Miles tambe tabata presente pa registra clientenan pa asina nan tambe por participa den nan campaña di fin di aña. Caha di orgel Mi Amor y Grupo di Aguinaldo Flor di Pasco a deleita tur presente cu nan dushi musica. Un ambiente familiar y sigur tur cu a atende a gosa di e actividad.
Durante e actividad aki a tene e final di e competencia di krans di pasco, un total di 9 krans a ser traha y tur esnan cu a bishita e centro por a vota pa e krans di pasco cu nan a haya mas bunita. Tur cu a bishita e centro nan nomber a bay den tombola pa e Christmas Basket como doorprize. Na final di atardi nos a saca e premionan. E prome luga di e competencia di krans di pasco a bay pa sra. Aldreline Brete y e di dos luga a bay pa sra. Carmelita Geerman. E Christmas Basket a ser gana pa sr. Jose Vrolijk. Un danki na tur participante y prepara pa otro aña pa otro competencia cu tema di pasco.
Directiva di Centro di Bario Savaneta kier a gradici tur hende cu a contribui cu nos pa e actividadnan di 2016. Nos lo sigui trece actividadnan den nos Centro pa asina trece e bario pero tambe e comunidad di Aruba mas cerca di otro.
Like e facebook-page di Centro di Bario Savaneta pa keda informa di e diferente actividadnan den e aña venidero. Pa mas informacion of pa bira boluntario di Centro di Bario Savaneta por tuma contacto libremente cu sr. Urvin Werleman na 568852 Of por manda un mail pa [email protected]