Un di e puntonan alarmante cu tin den nos enseñansa ta e fenomeno di klasnan grandi. Esaki ta trece como consecuencia cu e calidad di enseñansa pa cada un di e muchanan ta baha. Algo cu tambe ta bin acerca ta cu lo pone un presion enorme ariba e maestronan. No solamente e ta un presion pa e maestronan, pero tambe pa e studiante y mayornan cu eventualmente lo tin di bay atende scolnan leu di nan mesun bario di residencia, pa falta di acomodacion. Pa es motibo nos ta kere cu ta esencial pa, no solamente renoba e scolnan existente, pero tambe traha scol nobo y asina baha e cantidad di studiante pa e yega na ta uno cu e maestronan por carga.
Naturalmente lo mester di mas maestro y asistente den klas pa e scolnan extra cu lo bin. Lo mester busca forma pa encurasha nos hobennan pa sigui nan estudio sea ta na IPA of den exterior, pa cumpli cu e vacaturanan cu lo habri na e scolnan nobo.
Lo ta necesario pa haci un estudio cu lo sondea e posibilidadnan cu lo tin pa promove e profesion di docente na Aruba, y unda lo ta ideal pa traha e scolnan nobo.
Nos ta na altura cu a kita hopi di e incentivonan cu IPA tabata brinda na su candidatonan, pero awo mester buska un manera pa sea introduci nan di nobo of bin cu alternativanan atractivo pa esnan interesa den sigui cu nan estudio na e instituto aki.
MEP lo duna su debido atencion tambe na e fenomeno di studiantenan cu problema di comportacion.
Un studiante asina ta exigi hopi atencion for di un maestro, pero lastimamente esaki ta bay hopi biaha na costo di e tempo cu otro studiantenan tin cu haya den e mesun klas.
Lo mester busca un solucion pa e problematica aki, unda e studiante cu problema di comportacion por haya e debido yudansa y e atencion cu e ta rekeri. Pero tambe e otro studiantenan den klas no mester keda perhudica pa algun studiante cu tin problema di conducta.
Lo haci un estudio pa mira si tin e posibilidad di introduci scolnan dedica especialmente pa muchanan cu problema di conducta.