BEIJING, China – E ministerio di Asuntonan Exterior Chines a confirma e mandamento di barconan militar y avionnan di combate na e Mar di China Meridional tras di e incursion diadomingo di un destructor di misil Mericano cerca di e islanan Xisha.
“China a desplega barconan militar y avionnan di combate pa pone e destructor Mericano riba aviso,” e vocero di e minister Chines Lu Kang, diadomingo anochi den un comunicado.
E declaracionnan di e Gobierno Chines a tuma luga despues di a haya sa di e incursion di diadomingo di un destructor di misil Mericano dilanti di e islanan Xisha, ubica den e Mar di China Meridional y cu e pais asiatico ta considera bao di su soberania. “China ta insisti na Merca pa pone un fin di inmediato na e tipo di operacionnan provocativo cu ta viola e soberania di e pas aki y ta menasa su siguridad,” el a agrega.
Lu a cualifica e incursion di “pretexto bao di e libertad di nabegacion” sin e aprobacion previo di China y a subraya cu e islanan ta “parti inherente di e teritorio Chines,” di acuerdo cu e Ley di Republica Popular di China riba e Mar Teritorial y e Zona Contiguo, promulga na 1996.
“E comportamento aki ta constitui un serio provocacion politico y militar,” el a continua, “China ta fuertemente insatisfecho y ta opone firmemente na esaki.”
E vocero gubernamental a acusa Washington di actua den e direccion opuesto na e resto di paisnan di e region cu “ta aspira na e stabilidad, desaroyo y cooperacion.”
Apesar cu Merca y China a acerca posturanan tras di e reunion entre e presidente Donald Trump y su homologo Chines, Xi Jinping, na Florida, e friccionnan entre ambos den Mar di China Meridional, ta sigui ta recurente.
E presidentenan di China, Xi Jinping, y esun Mericano, Donald Trump, a mantene dialuna un combersarion telefonico riba Taiwan, Noord Korea y e proximo cumbre di lider di G20, e television oficial Chines a informa.
Fuente: http://www.lavanguardia.com/