E Presidente Chines, Xi Jinping, a priminti cu China lo suministra otro paisnan u total di 2.000 miyon di dosis di vacuna contra COVID-19 durante e aña’ki, aumentando su compromiso como e exportado di mas grandi di e vacunanan aki.
E anuncio di Xi a sosode diahuebs ultimo durante Foro Internacional riba Cooperacion di Vacuna COVID-19, medionan estatal a informa diabierna.
E cifra aki probablemente ta inclui e 770 miyon di dosis cu China ya caba a duna of exporta for di september aña pasa, segun Ministerio di Asuntonan Exterior. Mayoria di e vacunanan Chines ta exporta a base di acuerdonan bilateral. No ta conoci si e cifra ta inclui tambe e acuerdonan cu e programa COVAX, apoya door di ONU, den cual e dos fabricantenan Chines di vacuna lo suministra te cu 550 miyon di vacuna.
Xi tambe a priminti duna 100 miyon dollar na e programa COVAX, cu tin como meta distribui vacunanan na paisnan di entrada abou y mediano, asina e agencia oficial di noticia Xinhua a publica diahuebs.
Algun shen miyon di hangua Chines, e gran mayoria ta di e companianan Sinopharm y Sinovar, ya a wordo aplica riba personanan na hopi pais, pero ta existi e preocupacion riba e hecho si nan ta brinda un proteccion adecuado contra e variante nobo Delta, cu ta mas infeccioso.
Na Indonesia y Tailandia, cu a depende grandemente di e vacuna Sinovac, e gobiernonan ta planea pa uza dosisnan di Moderna pa aplica e extra riba trahadonan di salud, despues di informenan cu algun a muri a pesar di tabata completamente vacuna cu e vacuna Chines.
E dos vacunanan Chines, cu ta uza virusnan inactivo, a mustra menor efectividad contra e variante Delta pero asina mes ta brinda cierto proteccion, segun Feng Zijian, un funcionario di Centro di Control di Malesanan di China, cu na juni a duna un declaracion na e canal di television estatal CCTV.