Vocero di ministerio di relacion exterior na China, Hua Chunying, a bisa durante un conferencia di prensa cu China lo impone restriccion na biahe pa Hong Kong pa algun funcionario di Merca y otro represalia pa medida nan cu Washington a impone na individuonan di China.
Paspoort diplomatico Mericano cu bishita Hong Kong no lo ricibi temporalmente privilegio di entrada. Funcionario di administracion di Merca, trahado di e congreso, trahado di organisacion no gubernamental y nan famia lo confronta ‘sancion reciproco’.
Esaki ta bin pa motibo cu Mericano a pone sancion cu ta impedi cierto funcionarionan Chines y di Hong Kong pa biaha Merca of tin relacion cu e sistema financiero di Merca pa nan trabou di impone un ley di siguridad nacional aproba cu a cuminsa cu e represion contra e libertad di expresion y actividad politico di oposicion na Hong Kong.
Hua a bisa cu e medida a keda tuma pa parti di Mericano cu ta usando e cuestion di Hong Kong pa interferi den asuntonan interno di China y drenta den interes fundamental di e pais.
“China ta insta un bes mas pa Mericano stop di drenta den asuntonan di Hong Kong, interferi asunto interno di China y no bay den caminda robes”, Hua a bisa. China a menasa durante hopi tempo pa tuma represalia contra sancion di Merca y otro sancion cu ta considera hostil.