Awe China a anuncia cu parehanan casa di e pais ta wordo permiti pa haya te cu tres yiu, loke ta representa un suavisacion di e politico di e limite actual di dos yiu, segun informacion di e agencia Xinhua.
E cambio a wordo aproba durante un reunion di Oficina Politico di Comite Central di Partido Comunista di China presidi pa Presidente Xi Jinping, despues cu datonan di censo a mustra un caida dramatico den nacemento.
Xinhua no a indica ki tempo esaki lo drenta na vigor, pero e lo bini compaña pa medidanan di apoyo cu lo trece mehoracion di structura di e pais, pa cumpli cu e strategia di e pais di frena envehecimto di e poblacion.
Memei di mei, Oficina Nacional di Estadistica di China a publica resultadonan di e di shete censo nacional di poblacion, cu a mustra cu, aunke e poblacion di e parti continental di e pais a crece den 2020, e cantidad di nacementonan nobo a cay pa di cuatro aña sigui.
Particularmente, e poblacion total di e gigante Asiatico a aumenta na 1.412 miyon den 2020, compara cu e 1.400 miyon na 2019. No obstante, mamanan di e poblacion mas grandi di mundo a duna luz na solamente 12 miyon di baby aña pasa, menos cu e 14,65 miyon di 2019, loke a marca un caida anual di 18%.
Na China e tasa ta 1.3 yiu pa cada muhe, cu ta bou di e nivel di reemplaso di 2.1, cifra necesario pa mantene un poblacion stabiel. E averahe di yiu pa cada mama Chines aña pasa tabata 1.8
E resultadonan aki en gran parti ta debi na e politica di un yiu pa pareha, un medida di gobierno cu a drenta na vigor na 1979 y cual tabatin como meta limita e tasa di natalidad. Na 2016 a cambia e medida pa permiti parehanan haya dos yiu.