HONG KONG, China – E conductornan di Hong Kong lo mester di un permiso special pa uza e brug.
Autoridadnan di e region administrativo special di Hong Kong a anuncia den un comunicado cu e brug di Hong Kong-Zhuhai-Macao, cu tabata den construccion desde 2009, lo cuminsa opera diaranson 24 di october.
“E brug ta cla caba pa drenta den servicio”, e comunicado ta afirma, señalando cu e ultimo pruebanan a wordo realisa luna pasa.
Di mes manera, a anuncia cu e ceremonia di inauguracion di e infrastructura nobo lo tuma luga diamars 23 di october den e ciudad di Zhuhai, den e provincia Chines di Guangdong. Segun AFP, probablemente e president Chines, Xi Jinping lo asisti na e evento.
E brug di 55 km, cu apart di un caminda ariba lama ta conta cu’n tunnel, lo tin como su punto focal, e entrada den Hong Kong, situa cerca di su aeropuerto internacional.
E obra lo sirbi pa uni Guangdong, Hong Kong y Macao, “consolidando asina e posicion di Hong Kong como centro regional di aviacion y logistica”, e comunicado di autoridadnan ta bisa.
Mientras cu algun ta wak e brug como un maravilla di ingenieria, den e pais Asiatico ta existi opinionnan di cu e construccion tin como meta integra inda mas e ciudad semiautonomo di Hong Kong den China continental, AFP ta señala.
Anteriormente, autoridadnan a anuncia cu e conductornan cu uza e brug lo tin cu paga entre 60 yen (8 dollar) y 300 yen (14 dollar) pa cada biahe.
Pero no tur e conductornan lo tin acceso liber na e brug. Bou di e ley actual, autonan priva di Hong Kong mester un permiso special pa por crusa e brug y drenta territorio continental di China.
Mas di 10 mil habitante di Hong Kong ya a ricibi e permisonan aki. Ta trata di legisladornan local di e region y personanna cu negoshi den e provincia di Guangdong of personanan cu a haci un donacion di 5 miyon yen na organisacionnan benefico den e provincia.