BEIJING/LYON- Diadomingo gobierno di China a anuncia cu e ta investigando Hongwei pa sospecha di a viola ley.
E oficinanan principal di Interpol, ubica na Lyon, Francia, diadomingo 7 di october a ricibi e renuncia di su presidente, Meng Hongwei, cu tabata desapareci desde cu el a bandona e pais Europea na final di september y a resulta cu e autoridadnan Chines lo tabata tin’e deteni.
Segun e comunicado, e abandono di su funcionnan tin “efecto inmediato”, pa cual e Surcoreano, Kim Jong-yang lo ocupa su luga temporalmente te ora cu e organismo aki apunta un president nobo den un cumbre cu lo tuma luga entre 18 y 21 di november na Dubai, Emiratonan Arabe Uni.
Desaparicion
Meng a biaha pa China dia 29 di september ultimo. Su casa, cu ta biba na Lyon hunto cu nan dos yiunna, a raporta di su desaparicion pa cual autoridades Frances a habri un investigacion. Finalmente, dia 6 di octuber Interpol a indica cu el a pidi Beijing un “aclaracion” riba e paradero di su presidente.
Diadomingo, gobierno Chines a confirma den un comunicado cu su Comision Nacional di Supervision ta investigando Hongwei, cu tambe ta vice minister di Siguridad Publico di China, ya cu e ta sospecha cu el a viola ley Chines, aunke e no a duna detaye di niun di e supuesto delitonan.
Den su prome comentarionan publico ariba e caso, e casa di e president, Grace Meng, a informa cu su casa lo a mand’e un potret di un cuchiu prome cu el a disparce pa cual e ta kere cu esaki tabata su manera di comunica cu e tabata den peliger. Ademas, cuater minuut prome Hongwei lo a mand’e un mensahe, bisando “warda ariba mi yamada”.
Mengo Hongwei a wordo eligi president di Interpol na november 2016 y a reemplaza e Frances Mireille Ballestrazzi den e cargo.