PEKING, China – Bombarderonan cu capacidad pa lansamento di misilnan di crucero di e Forsa Aereo Chines ta “den maxima alerta,” loke Merca ta considera como un evidencia cu e Ehercito Chines ta prepara pa responde na un posibel situacion na Noord Korea, un funcionario di Defensa Mericano a bisa CNN.
E funcionario a bisa cu Merca tambe a mira un extraordinario cantidad di avion militar Chines ta wordo poni na punto mediante un intenso mantenimento.
E medidanan adopta aki recientemente pa China, ta wordo evalua como parti di un esfuerso pa “reduci e tempo di reaccion ante un contingencia na Noord Korea,” e funcionario a bisa.
Tal contingencia por inclui e riesgo di un conflicto arma, despues cu aumento di e tensionnan na e Peninsula como consecuencia di e multiple pruebanan di misil di Noord Korea.
Beijing a hiba hopi tempo preocupa pa e potencial instabilidad di Noord Korea si e regimen di Pyongyang colapsa, temiendo tanto e afluencia di refugiadonan como e posibel reunificacion bao di un Gobierno di Sur Korea, estrechamente vincula na Merca.
China tambe ta opone na e presencia militar di Merca na Sur Korea y a protesta pa e reciente decision di Merca y Sur Korea pa cuminsa e despliege di elementonan di e sistema di defensa antimisil THAAD.
Dado e estrecho vinculonan economico entre Noord Korea y China, autoridadnan militar Mericano a sostene cu Beijing ta crucial pa resolve e situacion di Noord Korea.
Varios alto funcionario di Gobierno a bisa na CNN diahuebs cu China awo ta e foco di e strategia di e administracion Trump cu respecto na Noord Korea.
“Ningun hende ta kere cu e Chinesnan lo bay presiona Noord Korea militarmente, of haci cu e regimen cay, pero e strategia ta apunta cu China ta haya un solucion politico mas cu otro cos,” un alto funcionario di e Gobierno a bisa.
E funcionarionan a bisa cu e enfoke di Trump ta basa riba un revision cuidadoso di e ultimo esfuersonan di Merca pa haci frente na Noord Korea, señalando cu durante e analisis di e negociacion fracasa cu e regimen di e famia Kim, un cos a keda hopi cla: “China nunca a eherce e maximo presion riba e regimen di Kim.”
Ta wordo calcula cu rond di 85% di e comercio di Noord Korea, ta depende di China.
Teniendo na cuenta e estrecho vinculonan economico aki, funcionarionan militar Mericano ta bisa cu Beijing ta crucial pa resolve e situacion di Noord Korea.
Y China parce a coresponde diaranson. E vocero di Ministerio di Asuntonan Exterior Chines, Lu Kang, a afirma cu Beijing tabata ‘gravemente preocupa’ pa e ultimo actividadnan nuclear di Noord Korea, mientras nan tabata alaba e enfoke di Washington pa e tema.
“E funcionarionan Mericano a haci algun observacion positivo y constructivo… manera e uzo di tur medionan pacifico posibel pa resolve e problema nuclear di e Peninsula (di Korea). Esaki ta representa un direccion cu nos ta kere ta corecto,” Lu a bisa.
Sin embargo, un alto funcionario di Gobierno a adverti cu e strategia centra na China ainda ta den un etapa tempran y cu “tin hopi mas etapa pa e final.”
Fuente: CNN en Español